അഭിമന്യു വധം: സിപിഐഎമ്മും പോപ്പുലര്‍ ഫ്രണ്ടും ഒത്തുകളിക്കുന്നുവെന്ന് ചെന്നിത്തല



timely news image

തിരുവനന്തപുരം: മഹാരാജാസ് കോളെജ് വിദ്യാര്‍ത്ഥി അഭിമന്യുവിന്റെ കൊലപാതക കേസില്‍ സിപിഐഎമ്മും പോപ്പുലര്‍ ഫ്രണ്ടും ഒത്തുകളിക്കുന്നുവെന്ന് പ്രതിപക്ഷ നേതാവ് രമേശ് ചെന്നിത്തല. യഥാര്‍ത്ഥ പ്രതികളെ പിടിക്കാത്തത് ഒത്തുകളി മൂലം. പ്രതികളെ സംരക്ഷിക്കുന്നുവെന്നും ചെന്നിത്തല ആരോപിച്ചു. അതേസമയം, മുന്‍ കാലങ്ങളിലെ സിപിഐഎം പാര്‍ട്ടി എടുത്ത നയം കണക്കിലെടുത്ത് പ്രതികള്‍ക്കെതിരെ തിരക്കിട്ട് യു.എ.പി.എ ചുമത്തേണ്ടതില്ലെന്ന് പൊലീസിന് നിയമോപദേശം ലഭിച്ചു. ഡയറക്ടര്‍ ജനറല്‍ ഓഫ് പ്രോസിക്യൂഷന്റെ ഓഫീസാണ് പൊലീസിന് നിയമോപദേശം നല്‍കിയത്. ഭരണകക്ഷിയുടെ രാഷ്ട്രീയ പിന്തുണ ലഭിക്കാത്തതിന് പുറമെ നിയമോപദേശം കൂടി ലഭിച്ചപ്പേള്‍ തല്‍ക്കാലം യു.എ.പി.എ ചുമത്തേണ്ടെന്ന് പൊലീസ് തീരുമാനിക്കുകയായിരുന്നു. കേസില്‍ ദേശീയ അന്വേഷണ ഏജന്‍സി പ്രാഥമിക വിവരങ്ങള്‍ ശേഖരിച്ചിട്ടുണ്ട്. എന്‍.ഐ.എ കേസ് ഏറ്റെടുക്കണമെന്ന് പൊലീസ് ആവശ്യപ്പെടില്ല. എന്നാല്‍ അന്വേഷണം ഏറ്റെടുക്കാന്‍ എന്‍.ഐ.എ മുന്നോട്ട് വന്നാല്‍ സര്‍ക്കാര്‍ എതിര്‍ത്തേക്കില്ല. അതിനിടെ പ്രതികളെ പിടികൂടുന്നതിനായി ഇതര സംസ്ഥാന പൊലീസിന്റെ സഹായവും പൊലീസ് തേടി. സംയുക്ത പരിശോധനയാണ് ആരംഭിച്ചത്. പ്രതികളില്‍ ചിലര്‍ ബംഗളൂരു വിമാനത്താവളം വഴി വിദേശത്തേക്ക് കടന്ന വിവരത്തെ തുടര്‍ന്ന് ഇന്റര്‍പോളിന്റെ സഹായവും പൊലീസ് തേടിയിട്ടുണ്ട്. മഹാരാജാസ് കോളേജ് വിദ്യാര്‍ത്ഥി മുഹമ്മദ് ഉള്‍പ്പടെയുള്ള മുഖ്യ പ്രതികളാണ് ഒളിവില്‍ കഴിയുന്നത്. പ്രതികളുടേതെന്ന് കരുതുന്ന സി.സി.ടി.വി ദൃശ്യങ്ങള്‍ കേന്ദ്രീകരിച്ച് പൊലീസ് അന്വേഷണം ഊര്‍ജിതമാക്കിയിട്ടുണ്ട്. അതിനിടെ കസ്റ്റഡിയിലുള്ള അഞ്ച് പേരില്‍ ചിലരുടെ അറസ്റ്റ് അന്വേഷണ സംഘം ഉടന്‍ രേഖപ്പെടുത്തിയേക്കും.



Kerala

Gulf


National

International