ലണ്ടൻ: ബ്രിട്ടീഷ് പാർലമെൻ്റിലേക്ക് വിജയിക്കുന്ന ആദ്യ മലയാളിയായി കോട്ടയം സ്വദേശി സോജൻ ജോസഫ്. കൺസർവേറ്റിവുകളുടെ കുത്തകയായിരുന്ന കെൻ്റിലെ ആഷ്ഫഡ് മണ്ഡലത്തിൽ നിന്ന് 1779 വോട്ടുകൾക്കാണ് ലേബർ പാർട്ടി സ്ഥാനാർത്ഥി സോജൻ്റെ വിജയം.
കൺസർവേറ്റിവ് സ്ഥാനാർത്ഥി ഡാമിയൻ ഗ്രീനിന് 13,484 വോട്ടുകൾ(28.7 ശതമാനം) മാത്രം ലഭിച്ചപ്പോൾ സോജൻ ജോസഫിന് 15,262 വോട്ടുകൾ(32.5 ശതമാനം) നേടാനായി.
റിഫോം യുകെയുടെ ട്രിസ്ട്രാം കെന്നഡി ഹാർപ്പർ 10000ലേറെ വോട്ട് നേടിയതും സോജൻ്റെ വിജയത്തിൽ നിർണായകമായി. രേസ മേയ് മന്ത്രിസഭയിൽ ഉപപ്രധാനമന്ത്രിയുടെ ചുമതല വഹിച്ചിട്ടുള്ള നേതാവാണ് ഗ്രീൻ. 1997 മുതൽ തുടർച്ചയായി ഇവിടത്തെ എം.പിയാണ്.
കൈപ്പുഴ ചാമക്കാലായിൽ ജോസഫിൻറെയും പരേതയായ ഏലിക്കുട്ടിയുടെയും മകനാണ് സോജൻ. മാന്നാനം കെ.ഇ കോളെജിലെ പഠന ശേഷം ബാഗ്ലൂരിൽ നിന്ന് നഴ്സിങ്ങ് പഠനം പൂർത്തിയാക്കി 2001ലാണ് യു.കെയിലെത്തുന്നത്.
കെൻറ് ആൻഡ് മെഡ്‌വേ എൻ.എച്ച്.എസ് ആൻഡ് സോഷ്യൽ കെയർ പാർട്‌നർഷിപ്പ് ട്രസ്റ്റിൽ മാനസികാരോഗ്യവിഭാഗം നഴ്‌സിങ് മേധാവിയാണ് സോജൻ ജോസഫ്. ഭാര്യ ബ്രൈറ്റ ജോസഫും നഴ്സാണ്.
വിദ്യാർത്ഥികളായ ഹാന്ന, സാറ, മാത്യു എന്നിവർ മക്കൾ. സോജൻറെ വിജയം ബ്രിട്ടനിലെ മലയാളികളെയാകെ ആവേശത്തിലാക്കിയിട്ടുണ്ട്. സ്വദേശമായ കൈപ്പുഴയിലെ വീട്ടിൽ ബന്ധുക്കളും സുഹൃത്തുക്കളും മധുരം വിതരണം ചെയ്തും പടക്കംപൊട്ടിച്ചുമാണ് ആഘോഷിച്ചത്.
ഒന്നര പതിറ്റാണ്ടോളമെത്തിയ കൺസർവേറ്റിവ് ഭരണത്തിനു തിരിച്ചടി നേരിട്ട ബ്രിട്ടനിൽ പാർലമെൻറിലേക്ക് തെരഞ്ഞെടുക്കപ്പട്ടത് 26 ഇന്ത്യൻ വംശജർ.
ടോറികളുടെ നേതാവും മുൻ പ്രധാനമന്ത്രിയുമായ ഋഷി സുനക് ഉൾപ്പെടെ നിരവധി നേതാക്കൾ കൺസർവേറ്റിവുകളിൽ നിന്നു വീണ്ടും പാർലമെൻറിലെത്തി.
യോർക്ക്ഷെയറിലെ റിച്ച്മണ്ട് – നോർത്താല്ലർടണിൽ നിന്നാണു സുനക് വീണ്ടും തെരഞ്ഞെടുക്കപ്പെട്ടത്. മുൻ ആഭ്യന്തര സെക്രട്ടറിമാരായ സുവെല്ല ബ്രേവർമാൻ, പ്രീതി പട്ടേൽ, മുൻ മന്ത്രി ക്ലെയർ കുടീഞ്ഞോ എന്നിവർ സ്വന്തം തട്ടകങ്ങൾ നിലനിർത്തി.
ഗഗൻ മഹീന്ദ്ര, ശിവാനി രാജ എന്നിവരും വിജയിച്ചു. ഇവരിൽ ശിവാനി പരാജയപ്പെടുത്തിയത് ലേബർ പാർട്ടിയുടെ ഇന്ത്യൻ വംശജനായ സ്ഥാനാർഥി രാജേഷ് അഗർവാളിനെയാണെന്നതും കൗതുകം.
അതേസമയം, ടോറി സ്ഥാനാർത്ഥികളിൽ ഇന്ത്യൻ വംശജരായ ശൈലേഷ് വരയുടെയും അമീത് ജോഗിയയുടെയും പരാജയം അപ്രതീക്ഷിതമായി.
മുതിർന്ന നേതാക്കളായ സീമ മൽഹോത്ര, വലേറി വാസ്(കീത്ത് വാസിൻറെ സഹോദരി), ലിസ നന്ദി, പ്രീത് കൗർ ഗിൽ, തമൻജീത് സിങ് ധേശി, നവേന്ദു മിശ്ര, നാദിയ വിറ്റോം തുടങ്ങിയവരാണ് ലേബർ പാർട്ടി നിരയിൽ വിജയിച്ച ഇന്ത്യൻ വംശജരായ മുതിർന്ന നേതാക്കൾ.
ജാസ് അത്‌വാൾ, ബാഗി ശങ്കർ, സത്‌വീർ കൗർ, ഹർപ്രീത് ഉപ്പൽ, വരീന്ദർ ജസ്, ഗുരീന്ദർ ജോസൻ, കനിഷ്ക നാരായാൺ, സോണിയ കുമാർ, സുരീന ബ്രാക്കൻ ബ്രിഡ്ജ്, കിരിച് എൻ്റ്‌വിസിൽ, ജീവൻ സന്ധേർ, സോജൻ ജോസഫ് എന്നിവർ ലേബർ പാർട്ടിയുടെ ബെഞ്ചുകളിലെ പുതുമുഖ നിരയിലുള്ള ഇന്ത്യൻ വംശജരാണ്.
