സമയക്രമം പാലിക്കണമെന്ന നിർബന്ധം പലപ്പോഴും സ്വകാര്യ ബസുകളുടെ മത്സരയോട്ടമായി മാറുകയാണ്. ഒരേ റൂട്ടിൽ അടുത്തടുത്ത സമയങ്ങളിൽ സർവീസ് നടത്തുന്ന ബസുകൾ യാത്രക്കാരെ പരമാവധി വേഗത്തിൽ കയറ്റിക്കൊണ്ടുപോകാനും എതിരാളിയായ ബസിനെ മറികടക്കാനും നടത്തുന്ന ശ്രമമാണ് അപകടങ്ങൾക്ക് പ്രധാന കാരണമാകുന്നതെന്ന ആക്ഷേപം ശക്തമാണ്. മുന്നിലുള്ള ബസിനെ മറികടക്കുന്നതിനായി വളവുകളിലും ജംഗ്ഷനുകളിലും പോലും വേഗം കുറയ്ക്കാതെ ഓടിക്കുന്ന സംഭവങ്ങൾ പതിവാണെന്നാണ് യാത്രക്കാരുടെ പരാതി.ബസ് സമയക്രമം പാലിക്കുന്നുണ്ടോ എന്നതിലുപരി, സുരക്ഷിതമായ രീതിയിലാണ് സർവീസ് നടത്തുന്നതെന്ന് ഉറപ്പാക്കേണ്ട ഉത്തരവാദിത്തം ബന്ധപ്പെട്ട അധികൃതർക്കുണ്ട്. എന്നാൽ സമയക്രമം തെറ്റിയാൽ സർവീസ് നഷ്ടപ്പെടുമെന്ന ആശങ്കയാണ് പല ഡ്രൈവർമാരെയും അമിതവേഗത്തിലേക്ക് നയിക്കുന്നതെന്നാണ് ബസ് ജീവനക്കാരുമായി ബന്ധപ്പെട്ടവരും പറയുന്നത്. റോഡിലെ ഗതാഗതക്കുരുക്ക്, ജംഗ്ഷനുകളിലെ തിരക്ക്, യാത്രക്കാരെ കയറ്റാനും ഇറക്കാനുമെടുക്കുന്ന സമയം തുടങ്ങിയ കാര്യങ്ങൾ കണക്കിലെടുക്കാതെയുള്ള സമയക്രമമാണ് മത്സരയോട്ടത്തിന് സാഹചര്യമൊരുക്കുന്നതെന്നും വിമർശനമുണ്ട്.തൊടുപുഴ–മൂവാറ്റുപുഴ റൂട്ടിൽ മാത്രമല്ല, ജില്ലയിലെ വിവിധ പ്രധാന റൂട്ടുകളിലും സ്വകാര്യ ബസുകളുടെ മത്സരയോട്ടം സംബന്ധിച്ച് പരാതികൾ ഉയരുന്നുണ്ട്. നഗരപരിധിയിൽ ഗതാഗതക്കുരുക്ക് മൂലം നഷ്ടപ്പെടുന്ന സമയം പിന്നീട് പരിഹരിക്കാൻ ജില്ലാ അതിർത്തി പിന്നിട്ടാൽ വേഗം കൂട്ടുന്ന രീതിയാണ് പലപ്പോഴും കാണുന്നത്. ഇതോടെ ബസിനുള്ളിലെ യാത്രക്കാരുടെ സുരക്ഷ മാത്രമല്ല, എതിരെ വരുന്ന വാഹനങ്ങളുടെയും ഇരുചക്ര വാഹന യാത്രികരുടെയും കാൽനടയാത്രക്കാരുടെയും സുരക്ഷയും അപകടത്തിലാകുന്നു.ബസുകളുടെ സമയക്രമം പുനഃപരിശോധിച്ച് യാഥാർഥ്യബോധത്തോടെ പുതുക്കണമെന്ന ആവശ്യവും ശക്തമാണ്. ഗതാഗതക്കുരുക്ക് കൂടുതലുള്ള ഭാഗങ്ങൾ, പ്രധാന ജംഗ്ഷനുകൾ, സ്കൂൾ–ആശുപത്രി മേഖലകൾ എന്നിവ കണക്കിലെടുത്ത് ഓരോ റൂട്ടിനും ശാസ്ത്രീയമായ റണ്ണിംഗ് ടൈം നിശ്ചയിക്കണം. സമയക്രമം പാലിക്കാത്തതിന് നടപടി വേണമെന്നതുപോലെ, സമയക്രമം പാലിക്കാൻ ഡ്രൈവർമാരെ അപകടകരമായ രീതിയിൽ വാഹനമോടിക്കാൻ നിർബന്ധിതരാക്കുന്ന സാഹചര്യവും ഒഴിവാക്കേണ്ടതുണ്ട്.അമിതവേഗം കണ്ടെത്താൻ സ്പീഡ് ഗൺ പരിശോധന, സി.സി.ടി.വി. നിരീക്ഷണം, ബസുകളിലെ ജി.പി.എസ്. വിവരങ്ങളുടെ പരിശോധന എന്നിവ കർശനമാക്കണമെന്ന ആവശ്യവും ഉയരുന്നുണ്ട്. അപകടമുണ്ടായതിന് ശേഷം മാത്രം നടപടി സ്വീകരിക്കുന്നതിന് പകരം അപകടസാധ്യതയുള്ള റൂട്ടുകളിൽ സ്ഥിരമായ പരിശോധനയും നിരീക്ഷണവും ഉറപ്പാക്കണമെന്നാണ് നാട്ടുകാരുടെ ആവശ്യം.സമയത്ത് ലക്ഷ്യസ്ഥാനത്തെത്തിക്കുന്നതിനെക്കാൾ പ്രധാനം യാത്രക്കാരെ സുരക്ഷിതമായി ലക്ഷ്യസ്ഥാനത്തെത്തിക്കുകയെന്നതാണ്. ഏതാനും മിനിറ്റുകളുടെ സമയലാഭത്തിനായി ഒരു ജീവൻ പോലും നഷ്ടപ്പെടുന്ന സാഹചര്യം ഉണ്ടാകരുത്. മത്സരയോട്ടം നിയന്ത്രിക്കുന്നതിനൊപ്പം ബസ് പെർമിറ്റ്, സമയക്രമം, ഡ്രൈവർമാരുടെ പ്രവൃത്തിസമയം, റോഡിന്റെ നിലവാരം എന്നിവ കൂടി പരിശോധിച്ച് സമഗ്രമായ പരിഹാരമാണ് ആവശ്യം. അല്ലാത്തപക്ഷം ഇന്നത്തെ അപകടം നാളെയും ആവർത്തിക്കാനുള്ള സാധ്യത ഏറെയാണ്.
