തൊടുപുഴ: കെ.എസ്.എസ്.പി.യു അറക്കുളം ബ്ലോക്കിന്റെ ആഭിമുഖ്യത്തിൽ മുട്ടം കക്കുഴിയിൽ വർക്കി – അന്ന മെമ്മോറിയൽ എൻഡോവ്മെന്റ് മൂന്നാമത് ക്വിസ് മത്സരം അറക്കുളം സെന്റ് മേരീസ് എച്ച്.എസ്.എസ്സിൽ സംഘടിപ്പിക്കുമെന്ന് ഭാരവാഹികൾ അറിയിച്ചു. ഒമ്പതിന് രാവിലെ 10ന് സെന്റ് മേരീസ് എച്ച്.എസ്.എസ് പ്രിൻസിപ്പൽ അവിരാ ജോസഫ് ഉദ്ഘാടനം നിർവ്വഹിക്കും.
മുട്ടം, കുടയത്തൂർ, അറക്കുളം പഞ്ചായത്തുകളിലെ പൊതു വിദ്യാലയങ്ങളിൽ പഠിക്കുന്ന എൽ.പി, യു.പി, എച്ച്.എസ്, എച്ച്.എസ്.എസ് വിഭാഗങ്ങളിലായാണ് മത്സരം നടത്തുന്നത്. 60 ശതമാനം ചോദ്യങ്ങൾ മഹാത്മാ ഗാന്ധിയെ കുറിച്ചും 40 ശതമാനം ചോദ്യങ്ങൾ സമകാലിക വിഷയങ്ങളെ ആസ്പദമാക്കിയുമാണ്. ഒന്നും രണ്ടും മൂന്നും സ്ഥാനങ്ങൾ കരസ്ഥമാക്കുന്നവർക്ക് ക്യാഷ് അവാർഡുകളും സർട്ടിഫിക്കറ്റുകളും നൽകും. പങ്കെടുക്കുന്ന മുഴുവൻ കുട്ടികൾക്കും പ്രോത്സാഹന സമ്മാനങ്ങളും വിതരണം ചെയ്യും.
താൽപര്യമുള്ള വിദ്യാർത്ഥികൾ സ്കൂൾ അധികൃതരുടെ സാക്ഷ്യ പത്രത്തോടൊപ്പം അന്നേ ദിവസം രാവിലെ 9.30ന് സ്കൂളിൽ എത്തിച്ചേരണമെന്ന് കൺവീനർ പി.വി സൂര്യകുമാർ, ചെയർമാൻ കുരുവിള ജേക്കബ് എന്നിവർ അറിയിച്ചു.
