ന്യൂഡൽഹി: തെരഞ്ഞെടുപ്പുകളിൽ നരേന്ദ്രമോദിയെ ഉയർത്തിക്കാട്ടിയുള്ള ബി.ജെ.പിയുടെ പ്രചാരണരീതിയിൽ പരോക്ഷ വിമർശവുമായി ആർഎസ്എസ് തലവൻ മോഹൻ ഭാഗവത്. ഒറ്റ വ്യക്തിക്കോ പ്രത്യയശാസ്‌ത്രത്തിനോ രാജ്യത്തെ സൃഷ്ടിക്കാനോ തകർക്കാനോ കഴിയില്ലെന്ന്‌ മോഹൻ ഭാഗവത് നാഗ്പൂരിൽ പറഞ്ഞു.
മോദി സർക്കാർ പ്രചരിപ്പിക്കുന്ന ‘ഒരു രാജ്യം, ഒരു തെരഞ്ഞെടുപ്പ്‌’ എന്ന ആശയം ചോദ്യം ചെയ്യുന്നതാണ്‌ ഈ പരാമർശം. ‘മികച്ച രാജ്യങ്ങളിലെല്ലാം പലതരം ചിന്തയുണ്ട്‌. അവിടെ എല്ലാ സംവിധാനങ്ങളുമുണ്ട്‌. ചിന്തകളുടെയും സംവിധാനങ്ങളുടെയും ബാഹുല്യമുള്ളിടത്തേ പുരോഗതി കൈവരിക്കൂ’–- മോഹൻ ഭാഗവത് പറഞ്ഞു.കേന്ദ്രബജറ്റിനെ വിമർശിച്ചും മോഹൻ ഭാഗവത് രംഗത്ത് എത്തിയിരുന്നു. ബിജെപിയും ആർഎസ്എസ് നേതൃത്വവും തമ്മിലുള്ള അകൽച്ച വെളിപ്പെടുത്തുന്നതാണ് ആവർത്തിച്ചുയരുന്ന ഇത്തരം വിമർശങ്ങൾ.
