ഇടുക്കി: ഓണത്തിനോടനുബന്ധിച്ച് ജില്ലാകളക്ടറുടെ നേതൃത്വത്തില് കടകളില് പരിശോധന ശക്തമാക്കി. നിത്യോപയോഗ സാധനങ്ങളുടെ വിലവര്ദ്ധനവ് നിയന്ത്രിക്കുന്നതിനും കരിഞ്ചന്ത, പൂഴ്ത്തിവയ്പ് എന്നിവ തടയുന്നതിനുമാണ് പരിശോധന. വരും ദിവസങ്ങളിലും പരിശോധന തുടരുമെന്ന് ജില്ലാ കളക്ടര് ഡോ. ദിനേശന് ചെറുവാട്ട് അറിയിച്ചു.
പൊതുവിതരണ വകുപ്പ്, ലീഗല്മെട്രോളജി, പോലീസ്, റവന്യൂ, ഭക്ഷ്യ സുരക്ഷാ എന്നീ വകുപ്പുകളിലെ ഉദ്യോഗസ്ഥരെ ഉള്പ്പെടുത്തി സ്ക്വാഡ് രൂപീകരിച്ചാണ് പരിശോധന. ബുധനാഴ്ച 16 കടകള് പരിശോധിച്ചതില് മൂന്നിടങ്ങളില് ക്രമക്കേടുകള് കണ്ടെത്തി. മായം ചേര്ത്ത ഭക്ഷണ സാധനങ്ങള് വില്ക്കുന്ന കേസുകള് ശ്രദ്ധയില് പെട്ടാല് കര്ശന നടപടി സ്വീകരിക്കുമെന്ന് കളക്ടര് പറഞ്ഞു.
ഇത്തരം ശ്രമങ്ങള് തടയുന്നതിന് വ്യാപാരികളുടെ പൂര്ണമായ സഹകരണം വേണമെന്ന് കളക്ടര് ആവശ്യപ്പെട്ടു.
