തിരുവനന്തപുരം: മുഖ്യമന്ത്രി പിണറായി വിജയന്‍റെ മകൾ വീണയ്ക്ക് സ്വകാര്യ കമ്പനിയിൽ നിന്നു മാസപ്പടി ലഭിച്ചെന്ന ആരോപണം നിയമസഭയിൽ ആയുധമാക്കാൻ പ്രതിപക്ഷം തയാറെടുക്കുന്നു. കൊച്ചി മിനറൽസ് ആൻഡ് റൂട്ടൈൽ ലിമിറ്റഡെന്ന(സി.എം.ആർ.എൽ) സ്വകാര്യ കമ്പനിയിൽ നിന്ന് വീണയ്ക്ക് മാസപ്പടി ഇനത്തിൽ മൂന്നു വർഷത്തിനിടെ 1.72 കോടി രൂപ ലഭിച്ചതായി ആദായ നികുതി ഇന്‍ററിം സെറ്റിൽമെന്‍റ് ബോർഡ് കണ്ടെത്തിയിരുന്നു.
സേവനങ്ങളൊന്നും നൽകാതെയാണ് ഈ പണം നൽകിയിരിക്കുന്നതെന്നാണ് ആരോപണം. ഇതിനു മുമ്പും സഭയിൽ വീണയുടെ സ്ഥാപനത്തിന്‍റെ ഇടപാട് ചർച്ചയായിട്ടുണ്ട്. അതേസമയം, ചെവ്വാഴ്ച നടന്ന സഭ സമ്മേളനത്തിൽ വിലക്കയറ്റമുൾപ്പെടെ ചർച്ചയായിരുന്നു.
സപ്ലൈക്കോയിൽ നിന്നുള്ള സാധനങ്ങളുടെ ലഭ്യതയെക്കുറിച്ചുള്ള ചർച്ചയിൽ മന്ത്രി ജി. ആർ അനിലും പ്രതിപക്ഷ നേതാവ് വി.ഡി സതീശനും തമ്മിൽ വാഗ്ദ്വാദങ്ങളുണ്ടായി. അതിനിടെ പുതുപ്പള്ളിയിൽ ഉപതെരഞ്ഞെടുപ്പ് പ്രഖ്യാപിച്ച സാഹചര്യത്തിൽ നിയമസഭാ സമ്മേളനം വെട്ടിച്ചുരുക്കിയേക്കും. ഇതിനായി കാര്യോപദേശകസമിതി ഇന്ന് യോഗം ചേരും.
തെരഞ്ഞെടുപ്പ് പ്രഖ്യാപനം ഉണ്ടായ ഉടൻ തന്നെ മുഖ്യമന്ത്രി പിണറായി വിജയൻ, സ്പീക്കർ എ.എൻ. ഷംസീർ, പ്രതിപക്ഷ നേതാവ് വി.ഡി. സതീശൻ എന്നിവർ ഇതു സംബന്ധിച്ച് ആശയവിനിമയം നടത്തി. ഇതിന്‍റെ അടിസ്ഥാനത്തിലാണ് ഇന്ന് കാര്യോപദേശക സമിതി യോഗം നിശ്ചയിച്ചത്.
