ബാംഗ്ലൂർ: എജ്യു-ടെക് സ്ഥാപനമായ ബൈജൂസിന്‍റെ ഓഫിസുകൾ പൂട്ടുന്നു. പ്രതിസന്ധിക്കിടെ ചെലവ് ചുരുക്കലിന്‍റെ ഭാഗമായാണ് ബാംഗ്ലൂർ ആസ്ഥാനം ഒഴികെയുള്ള ഓഫീസുകൾ പൂട്ടുന്നത്.
കമ്പനിയിലെ 14,000 ജീവനക്കാർക്ക് വർക്ക് ഫ്രം ഹോമിലേക്ക് മാറാൻ നിർദേശം നൽകി. ആസ്ഥാന ഓഫിസിലെ ജീവനക്കാരും ബൈജൂസ് ട്യൂഷൻ സെന്‍ററുകളിലെ മുന്നൂറോളം ജീവനക്കാരും ഒഴികെ മറ്റെല്ലാവരും വർക്ക് ഫ്രം ഹോം രീതിയിലേക്ക് മാറും.
കുറച്ചു മാസങ്ങളായി ലീസ് കരാർ പുതുക്കുന്നില്ലെന്നും ഓഫിസുകൾ ഒഴിഞ്ഞുകൊണ്ടിരിക്കുകയാണെന്നും കമ്പനി വൃത്തങ്ങൾ അറിയിച്ചു. ഡൽഹി, ഗുരുഗ്രാം, മുംബൈ, പുണെ, ഹൈദരാബാദ്, ചെന്നൈ എന്നിവിടങ്ങളിലായി ഇരുപതിലധികം ഓഫീസുകളാണ് പൂട്ടുന്നത്.
കടുത്ത സാമ്പത്തിക പ്രതിസന്ധിയിലൂടെ പോകുന്ന കമ്പനിയിൽ ബൈജൂസ് ഇന്ത്യ സി.ഇ.ഒ അർജുൻ മോഹന്‍റെ പുനക്രമീകരണ നടപടികളുടെ ഭാഗമായാണ് ഈ മാറ്റം.
