തിരുവനന്തപുരം: ചലച്ചിത്ര നിർമ്മാതാവ് ഗാന്ധിമതി ബാലൻ(66) അന്തരിച്ചു. തിരുവനന്തപുരത്ത് സ്വകാര്യ ആശുപത്രിയിലായിരുന്നു അന്ത്യം. എക്കാലത്തും ഓർമ്മിക്കപ്പെടുന്ന ക്ലാസിക് സിനിമകളുടെ നിർമ്മാതാവായിരുന്നു.
കെ.ജി ജോർജ്ജ്, പത്മരാജൻ തുടങ്ങിയ പ്രശസ്ത സംവിധായകരുടെ മികച്ച സിനിമകൾ ഒരുക്കിയ ഗാന്ധിമതി ബാലൻ ഏറെക്കാലമായി സിനിമാനിർമ്മാണ രംഗത്ത് സജീവമായിരുന്നില്ല.
കച്ചവട ലക്ഷ്യം മുൻനിർത്തി മാത്രം സിനിമകളെടുക്കുന്ന നിർമ്മാതാക്കളിൽ നിന്നു വ്യത്യസ്തനായിരുന്നു അദ്ദേഹം. ഇത്തിരി നേരം ഒത്തിരി കാര്യം ആണ് ആദ്യ സിനിമ.
തുടർന്ന് ആദാമിന്റെ വാരിയെല്ല്, പഞ്ചവടി പാലം, മൂന്നാം പക്കം, തൂവാനത്തുമ്പികൾ, സുഖമോ ദേവി, മാളൂട്ടി, നൊമ്പരത്തിപ്പൂവ്, മണിവത്തൂരിലെ ആയിരം ശിവരാത്രികൾ, ഈ തണുത്ത വെളുപ്പാൻ കാലത്ത്, ഇരകൾ, പത്താംമുദയം തുടങ്ങി 30ൽ പരം ചിത്രങ്ങളുടെ നിർമാണവും വിതരണവും നിർവഹിച്ചു.
2015 നാഷനൽ ഗെയിംസ് ചീഫ് ഓർഗനൈസർ ആയിരുന്നു. തിരുവനന്തപുരത്തെ ധന്യ, രമ്യ തിയേറ്റർ ഉടമ ആണ്. പത്തനംതിട്ട ഇലന്തൂർ കാപ്പിൽ തറവാട് അംഗമാണ്. തിരുവനന്തപുരം 40 വർഷത്തിലേറെയായി തിരുവനന്തപുരത്താണ് താമസം.
ഭാര്യ അനിത. മക്കൾ: സൗമ്യ(ഫൗണ്ടർ ഡയറക്ടർ – ആലിബൈ സൈബർ ഫോറെൻസിക്സ്), അനന്ത പത്മനാഭൻ(മാനേജിങ്ങ് പാർട്ണർ – മെഡ്റൈഡ്, ഡയറക്ടർ – ലോക മെഡി സിറ്റി). മരുമക്കൾ: അൽക്ക നാരായൺ(ഗ്രാഫിക് ഡിസൈനർ), കെ.എം ശ്യാം(ഡയറക്ടർ – ആലിബൈ സൈബർ ഫോറെൻസിക്സ്, ഡയറക്ടർ- ഗാന്ധിമതി ട്രേഡിങ്ങ് & എക്സ്പോർട്സ്).
തിരുവനന്തപുരം വഴുതക്കാട് ആർടെക്ക് മീനാക്ഷിയിലാണ് താമസം. ആലിബൈയെന്ന പേരിൽ സൈബർ ഫോറെൻസിക് സ്റ്റാർട്ട്അപ്പ് കമ്പനി സ്ഥാപിച്ച് രാജ്യത്തെ ഒട്ടു മിക്ക കുറ്റാന്വേഷണ ഏജൻസികൾക്കും സൈബർ ഇന്റലിജൻസ് സേവനം നൽകുന്ന സ്ഥാപനം ആയി വളർത്തി.
ഇവന്റ്സ് ഗാന്ധിമതിയെന്ന ഇവന്റ്മാനേജ്മെന്റ് കമ്പനി ഉടമ കൂടിയായ ഗാന്ധിമതി ബാലൻ നാഷനൽ ഗെയിംസ് അടക്കം നിരവധി വലിയ പരിപാടികൾ സംഘടിപ്പിച്ചു.
മലയാളം സിനിമ അഭിനേതാക്കളുടെ സംഘടനയായ അമ്മ രൂപീകരിക്കുന്നതിന് നേതൃത്വം നൽകിയ ബാലൻ അമ്മ ഷോയെന്ന പേരിൽ നിരവധി താരനിശകൾ സംഘടിപ്പിച്ചിട്ടുണ്ട്.
ഗാന്ധിമതി എന്നത് ബാലന്റെ അമ്മയ്ക്ക് മഹാത്മാ ഗാന്ധി നൽകിയ പേരായിരുന്നു. അമ്മയുടെ പേര് സ്വന്തം പേരിനു മുന്നിൽ അദ്ദേഹം ചേർക്കുകയായിരുന്നു.
സംവിധായകൻ പത്മരാജന്റെ കൂടെയാണ് അദ്ദേഹം ഏറ്റവും കൂടുതൽ പടങ്ങൾ ചെയ്തത്. പ്ലാന്റേഷൻ, റിയൽ എസ്റ്റേറ്റ് ബിസിനസുകളിലും സജീവമായിരുന്നു.
