തിരുവനന്തപുരം: സമഗ്രവും ശാസ്‌ത്രീയവുമായ മാലിന്യ സംസ്‌കാരത്തിന്‌ പ്രാധാന്യം നൽകണമെന്നും മാലിന്യമുക്ത സംസ്ഥാനമാണ്‌ ലക്ഷ്യമെന്നും മുഖ്യമന്ത്രി പിണറായി വിജയൻ. മാലിന്യ സംസ്‌കരണത്തിന്‌ മികച്ച പ്രാധാന്യം ലഭിക്കണമെന്നും അദ്ദേഹം പറഞ്ഞു. ഗ്ലോബൽ എക്സ്പോ ഓൺ വേസ്റ്റ് മാനേജ്മെന്റ് ടെക്നോളജി-ജിഇഎക്‌സ് കേരള 23-ന്റെ ഉദ്ഘാടനം നിർവഹിച്ചുകൊണ്ട് എറണാകുളം മറൈൻഡ്രൈവിൽ നിന്ന് സംസാരിക്കുകയായിരുന്നു മുഖ്യമന്ത്രി.
കക്കൂസ് മാലിന്യ സംസ്‌കരണ പ്ലാന്റുകൾ സംസ്ഥാനത്തെ എല്ലാ ജില്ലകളിലും നിർമ്മിക്കും. സർക്കാർ, പ്ലാന്റുകൾ നിർമ്മിക്കുന്നതിനുള്ള നടപടികൾക്ക് തുടക്കമിട്ടതായും സമയബന്ധിതമായി പൂർത്തീകരിക്കുന്നതിന് തദ്ദേശ സ്വയംഭരണ സ്ഥാപനങ്ങളുടെ കൂട്ടായ പരിശ്രമം ആവശ്യമാണെന്നും മുഖ്യമന്ത്രി കൂട്ടിച്ചേർത്തു.
