ബാംഗ്ലൂർ: കർണാടകയിൽ പൊലീസ് വാഹനം ആക്രമിച്ച് മോഷണക്കേസ് പ്രതിയെ മോചിപ്പിച്ചു. വെള്ളിയാഴ്ച അർധരാത്രിയോടെയാണു ഗദക് ജില്ലയിലെ ബട്ടകേരി റെയിൽവേ മേൽപ്പാലത്തിനു സമീപമായിരുന്നു സംഭവം. സ്വകാര്യ വാഹനത്തിലെത്തിയ ഗുണ്ടാ സംഘം പൊലീസിനെ ആക്രമിച്ച ശേഷം പ്രതിയെ മോചിപ്പിക്കുകയായിരുന്നു. കൊപ്പാൾ ജില്ലയിലെ ഗംഗാവതി പൊലീസ് സ്‌റ്റേഷനിലെ ഉദ്യോഗസ്ഥരാണ് ആക്രമണത്തിനിരയായത്. നാല് പൊലീസുകാർക്ക് ആക്രമണത്തിൽ പരിക്കേറ്റു. ഇവരെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. അംജദ് അലിയെന്ന പ്രതിയുമായി വരുന്നതിനിടെയാണ് പൊലീസുകാരെ ആക്രമിച്ചത്. പൊലീസ് വാഹനത്തിന്റെ ചില്ലുകളും സംഘം അടിച്ച് തകർത്തു.
