മേപ്പാടി: വയനാട് ചൂരൽമലയിലുണ്ടായ ഉരുൾപൊട്ടലിൽ ചെളിയിൽ കുടുങ്ങിക്കിടന്നയാളെ രക്ഷപെടുത്തി. ചെളിയിൽ പുതഞ്ഞ് അനങ്ങാൻ സാധിക്കാതെ കിടക്കുന്ന പുരുഷന്റെ ചിത്രം മുമ്പ് പുറത്ത് വന്നിരുന്നു. അഗ്നിരക്ഷാസേനയാണ് ഇദ്ദേഹത്തെ രക്ഷിച്ച് പുറത്തെത്തിച്ചത്.
ഏറെ നേരത്തെ പരിശ്രമത്തിനൊടുവിലാണ് ഇദ്ദേഹത്തെ പുറത്തെത്തിച്ചത്. വിദഗ്ധ ചികിത്സയ്ക്കായി ആശുപത്രിയിലേക്ക് കൊണ്ടുപോകും. കുത്തിയൊലിച്ച മലവെള്ളപ്പാച്ചിലിനിടയിൽ പെട്ട് മണിക്കൂറുകളായി കഴുത്തറ്റം ചെളിയിൽ പുതഞ്ഞാണ് ഇയാൾ കിടന്നിരുന്നത്.
വ്യക്തിയുടെ കൂടുതൽ വിവരങ്ങൾ ലഭ്യമല്ല. ചെളിയിൽ പുതഞ്ഞ് അനങ്ങാൻ സാധിക്കാതെ കിടക്കുകയായിരുന്നു ഇദ്ദേഹം. ആറ് മണിക്കൂറുകളായി ഇങ്ങനെ കിടക്കുക ആയിരുന്നുവെന്നാണ് വിവരം. ചെളിയിൽ പുതഞ്ഞ നിലയിലായിരുന്നതിനാൽ രക്ഷാ സംഘത്തിന് ആദ്യം ഇദ്ദേഹത്തിനടുത്തേക്ക് എത്താൻ സാധിച്ചിരുന്നില്ല.
