തൃശൂർ: വാൽപ്പാറയിൽ കാട്ടാനയുടെ ആക്രമണത്തിൽ വയോധികയ്ക്ക് പരുക്ക്. തേയില തോട്ടം തൊഴിലാളി അന്നലക്ഷ്മികാരിക്കാണ്(67) പരുക്കേറ്റത്. മാനമ്പിള്ളി ഫോറസ്റ്റ് റിസർവിന് കീഴിലുള്ള ഇടിആർ എസ്റ്റേറ്റ് ഭാഗത്ത് 12 വീടുകൾ അടങ്ങിയ ലായം ഉണ്ടായിരുന്നു. ഇവിടേക്കാണ് കാട്ടാന എത്തിയത്.
രാത്രി ശബ്ദം കേട്ട് വീടിന് പുറത്തിറങ്ങിയപ്പോൾ അന്നലക്ഷ്മിയെ, ആന തുമ്പിക്കൈ കൊണ്ട് തട്ടി വീഴ്ത്തി കാൽ ചവിട്ടി ഒടിക്കുകയായിരുന്നു. മറ്റു വീടുകളിലെ ആളുകൾ ഉണർന്ന് ബഹളം വെച്ചതിനെത്തുടർന്നാണ് കാട്ടാന പിൻവാങ്ങിയത്.
അന്നലക്ഷ്മിയെ വാൽപ്പാറയിലെ സർക്കാർ ആശുപത്രിയിലെത്തിച്ചു. തുടർന്ന് വിദഗ്ധ ചികിത്സയ്ക്കായി കോയമ്പത്തൂരിലേക്ക് മാറ്റി. അന്നലക്ഷ്മിയുടെ ഇടുപ്പെല്ലിനും സാരമായ പരുക്കേറ്റിട്ടുണ്ട്.
