ഇടുക്കി: ചിന്നക്കനാൽ പഞ്ചായത്തിൽ എൽ.ഡി.എഫ് കൊണ്ടുവന്ന അവിശ്വാസം പാസായി, യു.ഡി.എഫിന് ഭരണം നഷ്‌ടമായി. പ്രസിഡന്റ് സിനി ബേബിക്കെതിരെ കൊണ്ടുവന്ന അവിശ്വാസം പാസായതോടെയാണ് യു.ഡി.എഫ് ഭരണത്തിൽ നിന്ന് പുറത്തായത്. ആറിനെതിരെ ഏഴുവോട്ടുകൾക്കാണ് അവിശ്വാസം പാസായത്. ചിന്നക്കനാൽ പഞ്ചായത്ത് ഭരണസമിതിയിൽ ആകെ 13 അംഗങ്ങളാണുള്ളത്.
ഇതിൽ എൽ.ഡി.എഫിനും യു.ഡി.എഫിനും ആറ് വീതം അംഗങ്ങളും ഒരു സ്വതന്ത്രയുമായിരുന്നു ഉണ്ടായിരുന്നത്. ഇരു മുന്നണികൾക്കും സ്വതന്ത്ര പിന്തുണ നൽകാത്തതിനെ തുടർന്ന് ആദ്യം നറുക്കെടുപ്പിലൂടെ യു.ഡി.എഫിന് ഭരണം ലഭിക്കുകയായിരുന്നു.
ഇന്നലെ അവിശ്വാസ പ്രമേയത്തിന്മേൽ നടന്ന വോട്ടെടുപ്പിൽ വേണാട്‌ വാർഡിൽ നിന്നുള്ള സ്വതന്ത്ര അംഗം എൽ.ഡി.എഫിനെ പിന്തുണക്കുകയായിരുന്നു. കക്ഷിനില: കോൺഗ്രസ്‌ – 6, സി.പി.ഐ – 4, സി.പി.ഐ(എം) – 2, സ്വതന്ത്ര – 1.
