ചെന്നൈ: പൗരത്വ ഭേദഗതി നിയമം അംഗീകരിക്കാനാവില്ലെന്ന് നടനും തമിഴക വെട്രി കഴകം നേതാവുമായ വിജയ്. മത മൈത്രി നിലനിൽക്കുന്നിടത്ത് ഭിന്നിപ്പുണ്ടാക്കാനുള്ള കേന്ദ്രത്തിന്റെ ശ്രമമാണ് പൗരത്വ ഭേദഗതി നിയമമെന്ന് വിജയ് പ്രതികരിച്ചു.
തമിഴ്നാട്ടിൽ സി.എ.എ നടപ്പാക്കില്ലെന്ന് ഉറപ്പ് നൽകണമെന്നും വിജയ് ആവശ്യപ്പെട്ടു. തമിഴക വെട്രി കഴകമെന്ന പേരിൽ പാർടി രൂപീകരിച്ച ശേഷമുള്ള നടന്റെ അദ്യത്തെ ഔദ്യോഗിക രാഷ്ട്രീയ പ്രതികരണമാണിത്.
മനുഷ്യത്വത്തിന് പകരം വിവേചനം കാട്ടുന്ന നിയമമാണ് ഇതെന്നും ഇന്ത്യ ബി.ജെ.പിയോട് ക്ഷമിക്കില്ലെന്നും തമിഴ്നാട് മുഖ്യമന്ത്രി സ്റ്റാലിനും പ്രതികരിച്ചിരുന്നു.
ഇന്നലെയാണ് പൗരത്വ ഭേദഗതി നിയമം കേന്ദ്രം പ്രാബല്യത്തിൽ കൊണ്ടു വന്നത്. വ്യാപക പ്രതിഷേധമാണ് നിയമത്തിനെതിരെ രാജ്യത്ത് നടക്കുന്നത്.