ഇടുക്കി: എലപ്പാറ പശുപ്പാറ പുളിങ്കട്ട ഈന്തുംകാലാ പുതുവലിൽ 10 വയസ്സുകാരി പനി ബാധിച്ച് മരിച്ചു. ജഗദീഷ് ഭവൻ ജഗദീഷ് – ശാരദാ ദമ്പതികളുടെ മകൾ അതുല്യ ജഗദീഷാണ്(10) മരിച്ചത്.
കഴിഞ്ഞ ഒരാഴ്ചക്കാലമായി പനി ബാധിച്ചതിനെ തുടർന്ന് പീരുമേട് താലൂക്ക് ആശുപത്രിയിൽ ചികിത്സയിലായിരുന്നു. വെള്ളിയാഴ്ച രാവിലെയും ചികിത്സ കഴിഞ്ഞ് വീട്ടിലേക്ക് മടങ്ങി. രാത്രി പനി കൂടുതലായതിനെ തുടർന്ന് തിരികെ കൊണ്ടുവരികയും വെളുപ്പിന് മൂന്നു മണിയോടു കൂടി മരണം സംഭവിക്കുകയും ആയിരുന്നു.
മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്മോർട്ടത്തിനായി ഇടുക്കി മെഡിക്കൽ കോളേജ് ആശുപത്രിയിലേക്ക് മാറ്റി. കൃത്യമായ മരണ കാരണം പോസ്റ്റ്മോർട്ടം റിപ്പോർട്ടിനു ശേഷമേ വ്യക്തമാവുകയുള്ളൂ. അതുല്യയുടെ കുടുംബം കഴിഞ്ഞ മൂന്നു മാസക്കാലമായി പാമ്പനാറിൽ ആണ് താമസിച്ചിരുന്നത്. സംഭവത്തിൽ പീരുമേട് പോലീസ് അന്വേഷണം നടത്തി വരികയാണ്.
