തൊടുപുഴ: മാർച്ച് 28ന് രാത്രിയാണ് ലീഗൽ മെട്രോളജി ഫ്ലൈയിംഗ് സ്ക്വാഡിലെ ഇൻസ്പെക്ടിംഗ് അസിസ്റ്റൻ്റ് സി.സി. ജോൺസൺ മദ്യപിച്ച് മിനി സിവിൽ സ്റ്റേഷന് മുന്നിൽ വീണ് കിടന്നത്.
അന്നേ ദിവസം രാത്രി ഓഫീസിലെ വാച്ചറും സ്വീപ്പറുമായ ഇ.ആ‍ർ അജിത്തിനെ ഇയാൾ അസഭ്യം പറയുകയും കൈയേറ്റം ചെയ്യാൻ ശ്രമിക്കുകയും ചെയ്തതായി പരാതിയുണ്ട്.
അജിത് ലീഗൽ മെട്രോളജി ജില്ലാ ഓഫീസർക്ക് ഇതുസംബന്ധിച്ച് പരാതി നൽകിയിരുന്നു. എന്നാൽ പരാതി തിരുവനന്തപുരത്തേക്ക് അയക്കും മുമ്പ് വിവരമറിഞ്ഞ കൺട്രോളർ അന്വേഷണ വിധേയമായി ഇയാളെ സസ്പെൻഡ് ചെയ്യുകയായിരുന്നു.
സ്ഥിരം മദ്യപാനിയായ ഇയാൾക്കെതിരെ മുമ്പും നിരവധി പരാതികളുണ്ടായിട്ടുണ്ട്. മൂന്നാറിൽ നിന്ന് അച്ചടക്കനടപടിയുടെ ഭാഗമായി സ്ഥലംമാറ്റം കിട്ടിയാണ് ഇയാൾ തൊടുപുഴയിലെത്തിയത്.
