കൊച്ചി: ദുബായിൽ വെച്ച് പീഡിപ്പിച്ചെന്ന യുവതിയുടെ പരാതിയിൽ നടൻ നിവിൻ പോളിയെ ചോദ്യം ചെയ്തു. കേസ് അന്വേഷിക്കുന്ന പ്രത്യേക സംഘമാണ് നിവിൻ പോളിയെ ചോദ്യം ചെയ്തത്.
ഗൂഢാലോചനയുണ്ടെന്ന നിവിന്‍റെ പരാതിയിലും നടന്‍റെ മൊഴി രേഖപ്പെടുത്തി. തനിക്കെതിരായ പീഡനപരാതിയിൽ ഗൂഢാലോചന അടക്കം ചൂണ്ടിക്കാട്ടിയും വിശദമായ അന്വേഷണം ആവശ്യപ്പെട്ടും നിവിൻ പോളി മുഖ്യമന്ത്രിക്കും പരാതി നൽകിയിരുന്നു.
ഈ രണ്ട് പരാതികളുടെയും അടിസ്ഥാനത്തിലാണ് എസ്ഐടിയുടെ ചോദ്യം ചെയ്യൽ. പീഡനം നടന്നുവെന്നു പറയുന്ന സമയത്ത് നിവിൻ കൊച്ചിയിലുണ്ടായിരുന്നുവെന്ന് തെളിയിക്കുന്ന രേഖകൾ നടൻ അന്വേഷണ സംഘത്തിന് നൽകിയിട്ടുണ്ട്.
പീഡനം നടന്നുവെന്ന് ആരോപിക്കുന്ന തീയതികളിൽ വർഷങ്ങൾക്ക് ശേഷമെന്ന സിനിമയുടെ കൊച്ചിയിലെ സെറ്റിലായിരുന്നുവെന്ന് ചിത്രത്തിന്‍റെ സംവിധായകൻ വിനീത് ശ്രീനിവാസനും വെളിപ്പെടുത്തിയിരുന്നു.
നിവിന്‍റെ പരാതിയിൽ യുവതിയെയും ഭർത്താവിനെയും എസ്.ഐ.ടി നേരത്തെ ചോദ്യം ചെയ്തിരുന്നു. യുവതിയുടെ പാസ്പോർട്ട് വിവരങ്ങടക്കം പൊലീസ് ശേഖരിച്ചിട്ടുണ്ട്.
ദുബായിലെത്തിച്ച് പീഡിപ്പിച്ചതായുള്ള നേര്യമംഗലം സ്വദേശിനിയുടെ പരാതിയിൽ നടൻ നിവിൻ പോളി ഉൾപ്പെടെ ആറ് പേർക്കെതിരേയാണ് കേസെടുത്തിരിക്കുന്നത്. കേസിൽ നിവിൻ ആറാം പ്രതിയാണ്.
