കോഴിക്കോട്: വടകര മണ്ഡലം സംബന്ധിച്ച് മാധ്യമങ്ങൾ പ്രസിദ്ധീകരിക്കുന്നതെല്ലാം പെയ്ഡ് സർവ്വേകളെന്ന് സി.പി.ഐ.എം കോഴിക്കോട് ജില്ലാ സെക്രട്ടറി പി മോഹനൻ. ഇതൊക്കെയും ഇടതുപക്ഷ വിരുദ്ധതയുടെ ഭാഗമാണെന്നും അദ്ദേഹം പറഞ്ഞു.
മാതൃഭൂമി നടത്തുന്നത്‌ കോൺഗ്രസ് പ്രചാരണമെന്ന് എൽഡിഎഫ്‌ കോഴിക്കോട് പാർലമെന്റ്‌ മണ്ഡലം സെക്രട്ടറി എ പ്രദീപ്‌കുമാറും പ്രസ്‌താവനയിൽ പറഞ്ഞു.
വടകരയിൽ യു.ഡി.എഫ് ചുവടുറപ്പിച്ചെന്ന് പറയുന്നവർ വടകരയിൽ കണ്ണ് തുറന്നു നടക്കണമെന്ന് പി മോഹനൻ പറഞ്ഞു. വടകരയിൽ എൽ.ഡി.എഫ് ജയിക്കും.
അനുഭവങ്ങളുടെ അടിസ്ഥാനത്തിൽ ജനങ്ങൾ തീരുമാനമെടുത്തിട്ടുണ്ട്. പെയ്ഡ് സർവ്വേകൾ കൊണ്ട് അത് മാറ്റാൻ സാധിക്കില്ല. വടകരയിൽ കോൺഗ്രസ് അവഗണിക്കപ്പെട്ടു. മുതിർന്ന നേതാക്കൾ പോലും ചിത്രത്തിൽ ഇല്ലെന്നും പി മോഹനൻ പറഞ്ഞു.
തെരഞ്ഞെടുപ്പിൽ ജനവികാരം ഇടതുപക്ഷത്തിന്‌ അനുകൂലമാണെന്ന്‌ വന്നപ്പോൾ കോൺഗ്രസിനെ എങ്ങനെയെങ്കിലും കരകയറ്റാനാകുമോയെന്ന്‌ പരിശ്രമിക്കുകയാണ്‌ മാതൃഭൂമി പത്രമെന്ന്‌ എ പ്രദീപ്‌കുമാർ പറഞ്ഞു.
മാതൃഭൂമി അതിന്റെ വായനക്കാരെ കബളിപ്പിക്കുന്നതിന്‌ ഒന്നാംതരം തെളിവാണ്‌ തെരഞ്ഞെടുപ്പ്‌ അവലോകനമെന്ന മട്ടിൽ ഏപ്രിൽ 24ന്‌ എഡിറ്റ്‌ പേജിൽ പ്രസിദ്ധീകരിച്ച റിപ്പോർട്ട് നിഗമനങ്ങളെന്നും അങ്ങേയറ്റം അടിസ്ഥാനരഹിതമായ കോൺഗ്രസ് അനുകൂല പ്രചാരണമാണ് അതെന്നും കൂട്ടിച്ചേർത്തു.
