ആലപ്പുഴ: റോഡ് നിയമം ലംഘനച്ചിന് ശിക്ഷിക്കപ്പെട്ട യൂട്യൂബർ സഞ്ജു ടെക്കിയെ സർക്കാർ സ്കൂളിലെ പരിപാടിയിൽ മുഖ്യാതിഥിയായി ക്ഷണിച്ചു. ഗതാഗത നിയമ ലംഘനം നടത്തിയതിന് കോടതിയില് കേസ് നടക്കുന്നതിനിടെയാണ് ആലപ്പുഴ മണ്ണഞ്ചേരി ഗവ. ഹൈസ്കൂളിലെ കുട്ടികളുടെ മാഗസിന് പ്രകാശന പരിപാടിയില് സഞ്ജു മുഖ്യാതിഥിയാകുന്നത്. സോഷ്യൽ മീഡിയ ഇൻഫ്ലുവൻസർ എന്നാണ് പരിപാടിയുടെ നോട്ടീസിലെ വിശേഷണം.
സി.പി.എം ഭരിക്കുന്ന ജില്ലാ പഞ്ചായത്താണ് പരിപാടി സംഘടിപ്പിക്കുന്നത്. നാട്ടുകാരനായതിനാലാണ് പരിപാടിക്ക് ക്ഷണിച്ചതെന്നാണ് പഞ്ചായത്തിന്റെ വിശദീകരണം. നോട്ടീസ് പ്രകാരം ഇന്ന് ഉച്ചയ്ക്ക് ശേഷമാണ് പരിപാടി സംഘടിപ്പിച്ചിരിക്കുന്നത്. കാറിനുള്ള സ്വിമ്മിങ്ങ് പൂള് നിര്മിച്ചതിന് സഞ്ജുവിന്റെ ലൈസന്സ് ആജീവനാന്ത കാലത്തേക്ക് റദ്ദാക്കിയിരുന്നു.
സഞ്ജു ടെക്കിക്കെതിരെ മൊബൈല് ഫോണില് സെല്ഫി വീഡിയോ ചിത്രീകരിച്ച് കൊണ്ട് അപകടകരമായ രീതിയില് വാഹനം ഓടിച്ചു, പബ്ലിക്ക് റോഡില് പലതവണ മത്സര ഓട്ടം നടത്തി, വാഹനത്തില് രൂപമാറ്റം വരുത്തി പൊതു നിരത്തില് ഉപയോഗിച്ചു, അമിത ശബ്ദമുള്ള സ്പീക്കര് ഘടിപ്പിച്ച് ശബ്ദ മലിനീകരണം ഉണ്ടാക്കി തുടങ്ങി, വാഹനത്തില് എല്.ഇ.ഡി ലൈറ്റുകള് ഘടിപ്പിച്ച് നിരത്തിലിറക്കി തുടങ്ങി നിരവധി നിയമലംഘനങ്ങളും എം.വി.ഡി കണ്ടെത്തിയത്.