പാലക്കാട്: വെറുപ്പും വിദ്വേഷവും മാത്രം ഉത്പാദിപ്പിക്കുന്ന ഒരു ഫാക്റ്ററിയിൽ ഇത്രയും കാലം ജോലി ചെയ്തതിൽ ജാള്യതയുണ്ടെന്ന് സന്ദീപ് വാര്യർ.
ഇനി സ്നേഹത്തിൻറെ കടയിൽ മെംബർഷിപ്പ് എടുക്കാനാണ് തൻറെ തീരുമാനമെന്നും ബി.ജെ.പി വിട്ട് കോൺഗ്രസിൽ ചേർന്നതിനെക്കുറിച്ച് സന്ദീപ് വാര്യർ വ്യക്തമാക്കി. സി.പി.എം – ബി.ജെ.പി ഒത്തുകളിയെ എതിർത്തതാണ് ബിജെപിയിൽ താൻ ചവിട്ടിമെതിക്കപ്പെടാൻ കാരണമായതെന്നും സന്ദീപ് വാര്യർ ആരോപിച്ചു.
അവിടെ അഭിപ്രായ സ്വാതന്ത്ര്യം ഉണ്ടായിരുന്നില്ല. ജനാധിപത്യവിരുദ്ധമായ സംവിധാനമാണ് ബിജെപിയിലുള്ളതെന്നും അദ്ദേഹം കൂട്ടിച്ചേർത്തു. ബി.ജെ.പി സംസ്ഥാന അധ്യക്ഷൻ കെ. സുരേന്ദ്രനും സംഘവും കാരണമാണ് താൻ കോൺഗ്രസിലെത്തിയതെന്നും, ബലിദാനികളുടെ ചിത്രം വച്ച് വോട്ട് പിടിക്കുകയാണ് ബിജെപി ചെയ്യുന്നതെന്നും സന്ദീപ്.
സ്വയംസേവകർ ചോദ്യം ചെയ്യേണ്ടത് തന്നെയല്ല, ബിജെപി സംസ്ഥാന നേതൃത്വത്തെയാണെന്നും അദ്ദേഹം പറഞ്ഞു. അതേസമയം, ബലിദാനികളെ വഞ്ചിക്കുകയാണ് സന്ദീപ് വാര്യർ ചെയ്തതെന്ന് ബിജെപി സംസ്ഥാന അധ്യക്ഷൻ കെ. സുരേന്ദ്രൻ പറഞ്ഞു.
കോൺഗ്രസിൽ സന്ദീപിന് വലിയ കസേരകൾ കിട്ടട്ടെ എന്നും, അവിടെ അദ്ദേഹം നീണാൾ വാഴട്ടെ എന്നും സുരേന്ദ്രൻ ആശംസിച്ചു. സന്ദീപ് വാര്യർക്കെതിരേ ബി.ജെ.പി നടപടിയെടുത്തിട്ടുള്ളതാണ്. അതിൻറെ കാരണം പൊതുസമൂഹത്തിൽ പറയാൻ കഴിയില്ലെന്നും പറഞ്ഞ സുരേന്ദ്രൻ, സന്ദീപ് വാര്യരുടെ കോൺഗ്രസ് പ്രവേശനം അപ്രസക്തമായ തിരക്കഥയാണെന്നും പരിഹസിച്ചു.
