കൊച്ചി: ലൈംഗിക അതിക്രമ കേസിൽ നടൻമാരായ എം മുകേഷ് എം.എൽ.എയ്ക്കും ഇടവേള ബാബുവിനും മുൻകൂർ ജാമ്യം. എറണാകുളം പ്രിൻസിപ്പൽ സെഷൻസ് കോടതിയാണ് ജാമ്യം അനുവദിച്ച് ഉത്തരവിട്ടത്.
വാദം പൂർത്തിയായ സാഹചര്യത്തിൽ വ്യാഴാഴ്ച ഏറെ വൈകിയാണ് കോടതി വിധി പുറപ്പെടുവിച്ചത്. ആലുവ സ്വദേശിനിയുടെ പരാതിയിൽ മുകേഷിനെതിരെ മരട് പൊലീസും ഇടവേള ബാബുവിനെതിരെ എറണാകുളം നോർത്ത് പൊലീസുമാണ് കേസെടുത്തിരുന്നത്.
ഇരുവർക്കും ജാമ്യം നൽകുന്നതിനെ പ്രോസിക്യൂഷൻ എതിർത്തിരുന്നു. അതേസമയം മണിയൻപിള്ള രാജുവിനെതിരെ ഫോർട്ട് കൊച്ചി പൊലീസ് രജിസ്റ്റർ ചെയ്ത കേസിൽ ജാമ്യം ലഭിക്കാവുന്ന വകുപ്പുകളാണെന്ന് പ്രോസിക്യൂഷൻ അറിയിച്ചതിനെ തുടർന്ന് അദ്ദേഹത്തിൻറെ ജാമ്യാപേക്ഷ തീർപ്പാക്കി.
ബലാത്സംഗക്കുറ്റം ചുമത്തപ്പെട്ട നടൻ സിദ്ദിഖിൻറെ മുൻകൂർ ജാമ്യാപേക്ഷയിൽ ഹൈക്കോടതി അന്വേഷണ സംഘത്തോട് റിപ്പോർട്ട് തേടിയിട്ടുണ്ട്.