തൃശൂർ: നിലവിലെ സാങ്കേതികവും പാരിസ്ഥിതികവുമായ പ്രശ്‌നങ്ങൾ പരിഹരിച്ചാൽ കെ-റെയ്ൽ(സിൽവർ ലൈൻ) പദ്ധതിയിൽ തുടർ നടപടികൾക്ക് സന്നദ്ധമാണെന്ന് കേന്ദ്ര റെയ്ൽവേ മന്ത്രി അശ്വിനി വൈഷ്ണവ്.
ഇക്കാര്യം ഡൽഹിയിൽ നടന്ന ചർച്ചയിൽ കേരള മുഖ്യമന്ത്രി പിണറായി വിജയനെ അറിയിച്ചിട്ടുണ്ട്. തൃശൂർ റെയ്ൽവേ സ്റ്റേഷൻ പുനരുദ്ധാരണ പദ്ധതികൾ സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. തൃശൂർ റെയ്ൽവേ വികസനത്തിന്‌ വേണ്ടി 393 കോടി രൂപഅനുവദിച്ചതായി അശ്വിനി വ്യക്തമാക്കി.
കോഴിക്കോട് അടക്കം കേരളത്തിലെ 35 റെയ്ൽവേ സ്റ്റേഷൻ അമൃത് ഭാരത് പദ്ധതിയിൽ വികസിപ്പിക്കാനുള്ള പദ്ധതികൾ ആവിഷ്കരിച്ചിട്ടുണ്ടെന്നും അദ്ദേഹം പറഞ്ഞു. സഹകരണ ഫെഡറലിസത്തിലാണ് കേന്ദ്ര സർക്കാർ വിശ്വസിക്കുന്നത്.
ജനങ്ങളുടെ പുരോഗതിക്കായി കേന്ദ്രവും സംസ്ഥാനവും സഹകരിക്കണമെന്നാണ് കേന്ദ്രത്തിൻറെ ആഗ്രഹം. അതിനാൽ സാങ്കേതികവും പാരിസ്ഥിതികവുമായ പ്രശ്‌നങ്ങൾ പരിഹരിച്ച് പുതിയ നിർദേശങ്ങൾ മുന്നോട്ടുവച്ചാൽ കെ റെയ്ൽ പദ്ധതിയുടെ അടുത്ത നടപടികളിലേക്ക് കടക്കാൻ കേന്ദ്ര സർക്കാർ ഒരുക്കമാണെന്ന് മന്ത്രി വ്യക്തമാക്കി. 2020 ജൂണിലാണ് സംസ്ഥാന സർക്കാർ കെ റെയ്‌ലിൻറെ ഡിപിആർ കേന്ദ്ര സർക്കാരിന് സമർപ്പിച്ചത്.
തുടർന്ന് പാതയ്ക്ക് വേണ്ട സ്ഥലം ഏറ്റെടുക്കാൻ സർവെ കല്ല് ഇടുന്ന നടപടികൾ ആരംഭിച്ചു. എന്നാൽ ഇതിനെതിരേ സംസ്ഥാനത്തുടനീളം അതിശക്തമായ പ്രതിഷേധം ഉയർന്നതോടെ സംസ്ഥാന സർക്കാർ പദ്ധതിയിൽനിന്ന് പിന്നോക്കം പോയി.
സാങ്കേതിക - പാരിസ്ഥിതിക പ്രശ്‌നങ്ങൾ പരിഹരിച്ചാൽ പദ്ധതി പരിഗണിക്കാമെന്ന കേന്ദ്ര റെയ്ൽവേ മന്ത്രിയുടെ പുതിയ നിലപാട് സംസ്ഥാന സർക്കാരിന് അനുകൂലമായി മാറിയിക്കുകയാണ്.
കേന്ദ്ര സർക്കാരിൻറെ നിലപാടിനോട് സംസ്ഥാന സർക്കാരിൻറെ പ്രതികരണം വരും ദിവസങ്ങളിൽ ഉണ്ടായേക്കും. അങ്കമാലി - എരുമേലി ശബരി റെയ്ൽപാത പദ്ധതി യാഥാർഥ്യമാക്കാൻ കേന്ദ്രം പ്രതിജ്ഞാബദ്ധമാണ്.
അടുത്തിടെ ചില നിബന്ധനകൾ സഹിതം കേരള സർക്കാർ കേന്ദ്രത്തിന് കത്ത് അയച്ചിരുന്നു. മഹാരാഷ്‌ട്ര സർക്കാരുമായി റെയ്ൽവേ മന്ത്രാലയം ഉണ്ടാക്കിയ മാതൃക അടിസ്ഥാനമാക്കിയാണ് ശബരി പാതയും നിർമിക്കാൻ കേന്ദ്രം ആലോചിക്കുന്നത്.
ഇത് സംബന്ധിച്ച് വൈകാതെ കേരളത്തിന് കത്തയയ്ക്കും. അത് അംഗീകരിച്ചാൽ പദ്ധതി ആരംഭിക്കാൻ സാധിക്കും. 1997 – 1998ലെ റെയ്ൽവേ ബജറ്റിൽ പ്രഖ്യാപിച്ച പദ്ധതിയാണ് ശബരി പാത.
അലൈൻമെൻറ് അംഗീകരിക്കുകയും സ്ഥലം ഏറ്റെടുക്കൽ ആരംഭിക്കുകയും ചെയ്തിരുന്നു. എന്നാൽ പദ്ധതി എവിടെയും എത്തിയില്ല. ഇതിനിടെ കാലതാമസം വന്നതോടെ പദ്ധതിയുടെ പ്രതീക്ഷിക്കുന്ന ചെലവ് 36 ശതമാനം വർധിച്ച് 2,811 കോടിയിൽ നിന്ന് 3,811 കോടി രൂപയായി ഉയരുകയും ചെയ്തു.
ബാംഗ്ലൂർ മുതൽ ഷൊർണൂർ വരെ നാലു വരി പാതയും ഷൊർണൂർ മുതൽ എറണാകുളം വരെ മൂന്ന് വരിയും സ്ഥാപിക്കുമെന്ന് റെയ്ൽവേ മന്ത്രി അറിയിച്ചു. എറണാകുളം മുതൽ കോട്ടയം വഴി തിരുവനന്തപുരത്തേക്ക് മൂന്ന് ലൈനുകൾ സ്ഥാപിക്കും.
അതിനുള്ള സ്ഥലം ഏറ്റെടുത്ത നടപടികൾ വേഗത്തിൽ പൂർത്തിയാക്കും. ആലുവ, തൃശൂർ, കോഴിക്കോട് സ്റ്റേഷനുകളിലെ യാത്രക്കാരുടെ സൗകര്യങ്ങളും സ്റ്റേഷൻ അടിസ്ഥാന സൗകര്യങ്ങളും മന്ത്രി പരിശോധിച്ചു.
മുതിർന്ന ഉദ്യോഗസ്ഥരുമായുള്ള അവലോകന യോഗത്തിൽ മന്ത്രി അധ്യക്ഷത വഹിച്ചു. കേരളത്തിലെ റെയ്ൽ വികസന പദ്ധതികളുടെ വിശദമായ വിലയിരുത്തൽ നടത്തി.
കേന്ദ്ര മന്ത്രി ജോർജ് കുര്യൻ, മുൻ കേന്ദ്ര മന്ത്രിയും ബി.ജെ.പി ദേശീയ നിർവ്വാഹക സമിതി അംഗവുമായ വി മുരളീധരൻ, ബി.ജെ.പി ദേശീയ സമിതി അംഗവും റെയ്ൽവേ പാസഞ്ചേഴ്സ് അമിനിറ്റി കമ്മിറ്റി ചെയർമാനുമായ പി.കെ കൃഷ്ണദാസ്, ബി.ജെ.പി തൃശൂർ ജില്ലാ പ്രസിഡൻറ് കെ.കെ അനീഷ് കുമാർ, ജനറൽ സെക്രട്ടറി കെ.ആർ ഹരി എന്നിവരും ഒപ്പമുണ്ടായിരുന്നു. ഡൽഹിയിലെ തിരക്കുകൾ കാരണം കേന്ദ്രമന്ത്രിയും സ്ഥലം എം.പിയുമായ സുരേഷ് ഗോപി പങ്കെടുത്തില്ല.
