കൊച്ചി: സകല റെക്കോർഡുകളും തിരുത്തി 66,000 ത്തിനു തൊട്ടരികിൽ എത്തിയ സ്വർണവിലയിൽ ഇന്ന് ഇടിവ്. ശനിയാഴ്ച (22/03/2025) പവന് 320 രൂപ കൂറഞ്ഞ് ഒരു പവൻ സ്വർണത്തിൻറെ വില 65,840 രൂപയായി. ഗ്രാമിന് 40 രൂപയാണ് കുറഞ്ഞത്. ഒരു ഗ്രാം സ്വർണത്തിൻറെ വില 8230 രൂപയാണ്. മാർച്ച് 18നാണ് സംസ്ഥാനത്ത് ആദ്യമായി സ്വർണവില 66,000 തൊട്ടത്. ഒടുവിൽ വില ഉയർന്ന് 66,500 നരികിൽ വരെ എത്തിയിരുന്നു. എന്നാൽ തൊട്ടടുത്ത 2 ദിവസം മുതൽ കുറയുന്നതായാണ് കണ്ടത്.
ഇതിനു മുൻപ് ജനുവരി 22നാണ് സ്വർണവില ചരിത്രത്തിൽ ആദ്യമായി സ്വർണവില 60,000 കടക്കുന്നത്. ഓഹരി വിപണിയിലെ ചലനങ്ങളും രാജ്യാന്തര വിപണിയിലെ മാറ്റങ്ങളുമാണ് വിപണിയിൽ പ്രതിഫലിക്കുന്നത്. വിദേശ നിക്ഷേപകരുടെ മടങ്ങിവരവും ഡോളറിൻറെ ദൗർബല്യവും ഇന്ത്യയുടെ വളർച്ച സാദ്ധ്യതകളിലെ പ്രതീക്ഷയും വിപണിക്ക് ആവേശം പകർന്നു.
ഒരു മാസത്തിനിടെയിലെ ഏറ്റവും മികച്ച പ്രകടനമാണ് രൂപ വെള്ളിയാഴ്ച കാഴ്ചവച്ചത്. 4 ദിവസത്തിനിടെ രൂപയുടെ മൂല്യത്തിൽ 160 പൈസയുടെ വർദ്ധനയാണുണ്ടായത്. അതേസമയം, ഒരു ഗ്രാം സാധാരണ വെള്ളിയുടെ വില 112 രൂപയാണ്.
