കോട്ടയം: പുതുപ്പള്ളി ഉപതിരഞ്ഞെടുപ്പിൽ സംസ്ഥാന സഹകരണ- രജിസ്ട്രേഷന്‍ വകുപ്പ് മന്ത്രി വി.എന്‍.വാസവന്‍ വോട്ട് രേഖപ്പെടുത്തി. പാമ്പാടി എം.ജി.എം എച്ച്.എസ്.എസ് 102-ാം നമ്പർ ബൂത്തിൽ കുടുംബത്തോടൊപ്പം എത്തിയായിരുന്നു അദ്ദേഹം വോട്ട് രേഖപ്പെടുത്തിയത്.
പോളിങ്ങ് ശതമാനത്തിന്‍റെ കുറവോ കൂടുതലോ തിരഞ്ഞെടുപ്പിന്‍റെ വിജയ പരാജയത്തെ തീരുമാനിക്കുന്ന ഒരു ഘടകമല്ല എന്നതാണ് പുതുപ്പള്ളി മണ്ഡലത്തിലെ മുന്‍ അനുഭവങ്ങളെന്ന് അദ്ദേഹം പറഞ്ഞു. അതേസമയം, പുതുപ്പള്ളിയിൽ വോട്ടെടുപ്പ് ആരംഭിച്ച് 4 മണിക്കൂർ പിന്നിട്ടപ്പോൾ പോളിങ്ങ് മൊത്തം ശതമാനം 30 ആയിരുന്നു.
രാവിലെ 10 മണിയോടെ ആകെ പോൾ ചെയ്ത വോട്ട് : 35889. പുരുഷന്മാർ: 19157. സ്ത്രീകൾ: 16732, ട്രാൻസ്ജെൻഡർ: 0. പോളിങ് ആരംഭിച്ചപ്പോൾ തന്നെ മണ്ഡലത്തിലെ 182 ബൂത്തുകളിലും വോട്ടർമാരുടെ നീണ്ട നിര തന്നെയുണ്ട്.
മണർകാട് കണിയാംകുന്ന് ഗവ.എൽ.പി സ്‌കൂളിലെ 72ആം നമ്പർ ബൂത്തിൽ എൽ.ഡി.എഫ് സ്ഥാനാർഥി ജയ്ക്ക്.സി.തോമസ് വോട്ട് രേഖപ്പെടുത്തി. പുതുപ്പള്ളി ജോർജിയൻ പബ്ലിക് സ്‌കൂളിലെ 126-ാം നമ്പർ ബൂത്തിൽ യു.ഡി.എഫ് സ്ഥാനാർഥി ചാണ്ടി ഉമ്മനും കുടുംബവും വോട്ട് രേഖപ്പെടുത്തി.
