തിരുവനന്തപുരം: സംസ്ഥാനത്ത് കഴിഞ്ഞ 24 മണിക്കൂറിനുള്ളിൽ കേരളത്തിലെ 7 ജില്ലകളിൽ അൾട്രാ വയലറ്റ് രശ്മികളുടെ വികിരണ സൂചിക അപകടകരമായ നിലയിൽ ഉയർന്നതായി കാലാവസ്ഥ വകുപ്പ്. കൊല്ലം ജില്ലയിലെ കൊട്ടാരക്കര, ഇടുക്കിയിലെ മൂന്നാർ എന്നിവിടങ്ങളിലാണ്ണ് യുവി സൂചികയിൽ ഏറ്റവും ഉയർന്നത്. 10 വരെയാണ് ഇവിടങ്ങളിലെ യുവി സൂചിക. കൊല്ലം, ഇടുക്കി, പത്തനംതിട്ട, കോട്ടയം, ആലപ്പുഴ, പാലക്കാട്, മലപ്പുറം ജില്ലകളിൽ ഓറഞ്ച് അലർട്ടാണ്. യുവി സൂചിക 8-10 വരെ ഉയരുന്ന സാഹചര്യത്തിലാണ് ഓറഞ്ച് അലർട്ട് പ്രഖ്യാപിക്കുന്നത്. അതീവ ജാഗ്രത പാലിക്കേട്ട സാഹചര്യമാണെന്നാണ് ഇതുകൊണ്ട് അർഥമാക്കുന്നത്.
തിരുവനന്തപുരം, എറണാകുളം, തൃശൂർ, കോഴിക്കോട്, വയനാട് ജില്ലകളിൽ യെലോ അലർട്ടാണ്. തുടർച്ചയായി അൾട്രാ വയലറ്റ് രശ്മികൾ ശരീരത്തിലേൽക്കുന്നത് സൂര്യതാപത്തിനും നേത്രസംബന്ധമായ രോഗങ്ങൾക്കും കാരണമാവുന്നു. കടുത്ത ചൂടായതിനാൽ പകൽ സമയം പുറത്തിറങ്ങുമ്പോൾ ജാഗ്രത പാലിക്കണമെന്ന് മുന്നറിയിപ്പുണ്ട്.
