തിരുവനന്തപുരം: ലോക്സഭാ തെരഞ്ഞെടുപ്പിന് മുന്നോടിയായി കേരള സര്‍ക്കാരിന്‍റെ നേട്ടങ്ങള്‍ പ്രചരിപ്പിക്കാന്‍ മുഖ്യമന്ത്രിയും മന്ത്രിമാരും നടത്താൻ പോകുന്ന മണ്ഡല പര്യടനത്തെ പരിഹസിച്ച് കോൺഗ്രസ് നേതാവ് വി.ഡി.സതീശൻ.
കേരളപര്യടത്തിനായി കെഎസ്ആർടിസിയിൽ കയറും മുമ്പ് കണ്ടക്‌ടറോടും ഡ്രൈവറോടും ശമ്പളം കിട്ടിയിട്ട് എത്രനാളായെന്ന് ചോദിക്കണമെന്ന് അദ്ദേഹം പരിഹസിച്ചു. മന്ത്രിമാരുടെ യാത്ര കെഎസ്ആർടിസി ബസിലായിരിക്കുമെന്ന് അറിയിച്ചിരുന്നു.
ഇതിനെതിരെയാണ് പരിഹാസവുമായി സതീശൻ രംഗത്തെത്തിയിരിക്കുന്നത്. ‘കേരള സര്‍ക്കാരിന്‍റെ നേട്ടങ്ങള്‍ പ്രചരിപ്പിക്കാന്‍ മുഖ്യമന്ത്രിയും മന്ത്രിമാരും എല്ലാ മണ്ഡലങ്ങളിലും പര്യടനം നടത്തുന്നുണ്ട്.
പ്രത്യേകം തയാറാക്കിയ കെഎസ്ആർടിസി ബസിലാണത്രേ യാത്ര! ബസില്‍ കയറുന്നതിന് മുന്‍പ് ഡ്രൈവര്‍ക്കും കണ്ടക്ടര്‍ക്കും ശമ്പളം കിട്ടിയിട്ട് എത്ര നാളായെന്ന് ചോദിക്കുന്നത് നന്നായിരിക്കും. ഇല്ലെങ്കില്‍ അവര്‍ ചിലപ്പോള്‍ നിങ്ങളെ വഴിയിലിട്ട് പോയാലോ! – സതീശൻ ഫെയ്സ്ബുക്കിൽ കുറിച്ചു.
