കൊച്ചി: സർവ റെക്കോർഡുകളും തിരുത്തി 66,000 തൊട്ട സ്വർണവില കുതിപ്പു തുടരുന്നു. വ്യാഴാഴ്ച (20/03/2025) പവന് 160 രൂപ കൂടി ഉയർന്നതോടെ ഒരു പവൻ സ്വർണത്തിൻറെ വില 66,480 രൂപയായി.
ഗ്രാമിന് 20 രൂപയാണ് കൂടിയത്. ഒരു ഗ്രാം സ്വർണത്തിൻറെ വില 8310 രൂപയാണ്. മാർച്ച് 18നാണ് സംസ്ഥാനത്ത് ആദ്യമായി സ്വർണവില 66,000 തൊട്ടത്. തുടർച്ചയായി രണ്ട് ദിവസമായി സ്വർണവില ഉയർന്നു കൊണ്ടെയിരുക്കുകയാണ്. ഇതിനു മുൻപ് ജനുവരി 22നാണ് സ്വർണവില ചരിത്രത്തിൽ ആദ്യമായി സ്വർണവില 60,000 കടക്കുന്നത്. ഓഹരി വിപണിയിലെ ചലനങ്ങളും രാജ്യാന്തര വിപണിയിലെ മാറ്റങ്ങളുമാണ് വിപണിയിൽ പ്രതിഫലിക്കുന്നത്.
അന്താരാഷ്ട്ര സ്വർണവില 3,055 ഡോളറിലേക്ക് ഉയർന്നിട്ടുണ്ട്, ഡോളറുമായി രൂപയുടെ വിനിമയ നിരക്ക് 86.7406 ആണ്. ഇസ്രയേലിൻറെ ഗാസ ആക്രണത്തിനു ശേഷം പശ്ചിമേഷ്യൻ സംഘർഷം വീണ്ടും മൂർച്ഛിച്ചതാണ് സ്വർണവിലയിലെ കുതിപ്പിനു കാരണം. ഇതോടെ, സ്വർണവില ഇനിയും ഉയരുമെന്ന സൂചനകളാണ് ലഭിക്കുന്നത്. അതേസമയം, ഒരു ഗ്രാം സാധാരണ വെള്ളിയുടെ വില 111 രൂപയാണ്.
