ചെന്നൈ: ബംഗാൾ ഉൾക്കടലിൽ രൂപം കൊണ്ട മിഷോങ് ചുഴലിക്കാറ്റിന്റെ പശ്ചാത്തലത്തിൽ തമിഴ്‌നാട്ടിൽ കനത്ത മഴ. ഇന്നലെ രാത്രി പെയ്‌ത കനത്ത മഴയിൽ ചെന്നൈ നഗരത്തിൽ പലയിടത്തും വെള്ളം കയറി.
വാഹന ഗതാഗതം തടസപ്പെട്ടു. നിരവധി വാഹനങ്ങളും വെള്ളത്തിൽ മുങ്ങി. പോരൂർ, മന്ദനന്തപുരം, കൊളപക്കം, തിലൈംഗനഗർ സബ്‌വേ , ഭായ് കട, വെളാച്ചേരി തുടങ്ങി നിരവധി സ്ഥലങ്ങൾ വെള്ളത്തിലാണ്.
ചെന്നൈ അടക്കം നാലു ജില്ലകളിൽ റെഡ് അലർട്ട് പുറപ്പെടുവിച്ചിട്ടുണ്ട്. ചെന്നൈ, തിരുവള്ളൂർ, ചെങ്കൽപ്പേട്ട്, കാഞ്ചിപുരം തുടങ്ങി ആറു ജില്ലകളിൽ പൊതു അവധി പ്രഖ്യാപിച്ചിട്ടുണ്ട്. സ്വകാര്യ സ്ഥാപനങ്ങൾ വർക്ക് ഫ്രം ഹോം നടപ്പാക്കാൻ നിർദേശിച്ചിട്ടുണ്ട്.
ചുഴലിക്കാറ്റിന്റെ പശ്ചാത്തലത്തിൽ വന്ദേഭാരത് അടക്കം നിരവധി ട്രെയിനുകൾ റദ്ദാക്കി. വ്യാസാർപാടിയിൽ റെയിൽവേ ട്രാക്ക് വെള്ളത്തിൽ മുങ്ങിയതോടെ ചെന്നൈ സെൻട്രലിലേക്ക് വരേണ്ട നിരവധി ട്രെയിനുകൾ റദ്ദാക്കി.
