ന്യൂഡൽഹി: എഴുത്തുകാരിയും സാമൂഹിക പ്രവർത്തകയുമായ സുധാ മൂർത്തിയെ രാജ്യസഭയിലേക്ക് നാമനിർദേശം ചെയ്തു. രാഷ്ട്രപതി ദ്രൗപതി മുർമുവാണ് സുധാ മൂർത്തിയെ നോമിനേറ്റ് ചെയ്തത്.
പ്രധാനമന്ത്രി നരേന്ദ്രമോദിയാണ് ഇക്കാര്യം ഔദ്യോഗികമായി എക്സ് പ്ലാറ്റ്ഫോമിലൂടെ അറിയിച്ചത്. നാരീശക്തിയുടെ ശക്തമായ സന്ദേശമായിരിക്കും സുധാ മൂർത്തിയുടെ രാജ്യസഭ പ്രവേശനമെന്നും പ്രധാന മന്ത്രി എക്സിൽ കുറിച്ചു.
ഇൻഫോസിസ് സ്ഥാപകൻ എൻ ആർ നാരായണ മൂർത്തിയുടെ ഭാര്യയും ഇൻഫോസിസ് ഫൗണ്ടേഷൻ മുൻ ചെയര്‌പേഴ്സണുമാണ്. കന്നഡ, ഇംഗ്ലീഷ് ഭാഷകളിൽ നിരവധി രചനകൾ പുറത്തിറക്കിയിട്ടുണ്ട്.
സാഹിത്യ രംഗത്തെ സംഭാവനയ്ക്ക് ആർ.കെ നാരായണൻ പുരസ്കാരം ലഭിച്ചു. 2006ൽ പത്മശ്രീയും 2023ൽ പത്മവിഭൂഷണും ലഭിച്ചിട്ടുണ്ട്.
