കോട്ടയം: പാലായിൽ ഒമ്പതാം ക്ലാസ് വിദ്യാർത്ഥിയെ സഹപാഠികൾ ക്രൂരമായി ഉപദ്രവിച്ചതായി പരാതി. കുട്ടിയെ സഹപാഠികൾ ചേർന്ന് ഉപദ്രവിച്ചതായും വസ്ത്രം ഊരി മാറ്റുകയും അത് വീഡിയോ എടുത്ത് പ്രചരിപ്പിക്കുകയും ചെയ്തു.
പാലാ സെൻറ് തോമസ് സ്കൂളിലാണ് സംഭവം. സംഭവത്തിൻറെ ദൃശ്യങ്ങൾ ഉൾപ്പെടെ പുറത്തുവന്നതോടെ കുട്ടിയുടെ പിതാവ് പൊലീസിൽ പരാതി നൽകി. കുട്ടിയെ ബലമായി പിടിച്ചുവച്ചശേഷം വസ്ത്രങ്ങൾ ഊരി മാറ്റുകയും എതിർക്കാൻ ശ്രമിച്ചെങ്കിലും നിലത്ത് വീണ കുട്ടിയുടെ സഹപാഠികളായ രണ്ടു പേർ ചേർന്ന് പിടിച്ചുവച്ച് ഉപദ്രവിച്ചു.
വിദ്യാർത്ഥിയുടെ നഗ്ന ദൃശ്യങ്ങളടങ്ങിയ വീഡിയോ പ്രചരിപ്പിച്ചുവെന്നാണ് പരാതി. മുൻപും സഹപാഠികൾ കുട്ടിയുടെ വീഡിയോ എടുത്ത് ഇത്തരത്തിൽ പ്രചരിപ്പിച്ചിട്ടുണ്ടെന്നും പിതാവ് പരാതിയിൽ പറയുന്നു. പരാതിയിൽ വിശദമായ അന്വേഷണം നടത്തി ഉടൻ നടപടി എടുക്കുമെന്ന് പൊലീസ് അറിയിച്ചു.
