പള്ളിവാസൽ: ഇടുക്കിയിലെത്തുന്ന വനിതാ യാത്രികർക്ക് കോടമഞ്ഞിന്റെ കുളിരും തേയിലത്തോട്ടത്തിന്റെ ഭംഗിയും ആസ്വദിച്ച് കുറഞ്ഞ ചെലവിൽ സുരക്ഷിതമായ താമസിക്കാം. പള്ളിവാസൽ ഗ്രാമപഞ്ചായത്തിൽ നിർമ്മാണം പൂർത്തിയായ ജില്ലയിലെ ആദ്യത്തെ ഷീ ലോഡ്ജാണ് ഈ സൗകര്യമൊരുക്കുന്നത്. പഞ്ചായത്തിലെ രണ്ടാം മൈലിൽ ഒന്നരക്കോടി രൂപ ചെലവഴിച്ചാണ് ഷീ ലോഡ്ജ് നിർമ്മിച്ചിരിക്കുന്നത്. ഏഴ് ബെഡ്റൂം, 16 പേർക്ക് താമസിക്കാവുന്ന ഡോർമിറ്ററി, റസ്റ്റോറന്റ് അടുക്കള തുടങ്ങി എല്ലാവിധ സൗകര്യങ്ങളുമിവിടെയുണ്ട്. സഞ്ചാരികൾക്കായി ഇഷ്ടാനുസരണമുള്ള വിഭവങ്ങളും ഒരുക്കി നൽകും.
റിസോർട്ടുകളിലേതിന് സമാനമായ ആധുനിക സൗകര്യങ്ങൾ എല്ലാം ഉൾപ്പെടുത്തിയാണ് ലോഡ്ജിന്റെ നിർമ്മാണം പൂർത്തീകരിച്ചിരിക്കുന്നത്. സഞ്ചാരികളുടെ വാഹനങ്ങൾ പാർക്ക് ചെയ്യാനുള്ള സൗകര്യവും ഇവിടെയുണ്ട്. ഇടുക്കി ഡാമിന്റെ വിദൂര കാഴ്ചയും മലനിരകളും മഞ്ഞിൽ പൊതിഞ്ഞു നിൽക്കുന്ന തേയില തോട്ടങ്ങളുടെ മനോഹാരിതയുമൊക്കെ ലോഡ്ജിൽ നിന്ന് ആവോളം ആസ്വദിക്കാം.
2022 – 2023 വാർഷിക പദ്ധതിയിൽ ഉൾപ്പെടുത്തി ബഹുവർഷപദ്ധതിയായിട്ടാണ് പള്ളിവാസൽ പഞ്ചായത്ത് ഇത് നടപ്പിലാക്കുന്നത്. ആഗസ്റ്റ് അവസാനത്തോടെ ഷീ ലോഡ്ജ് ഉദ്ഘാടനം ചെയ്യുമെന്ന് അധികൃതർ അറിയിച്ചു. എറണാകുളത്ത് വരുന്നവർക്ക് അടിമാലി – കല്ലാർ വഴിയും രാജാക്കാട് ഭാഗത്തു നിന്ന് വരുന്നവർക്ക് കുഞ്ചിത്തണ്ണി – ചിത്തിരപുരം വഴിയും കട്ടപ്പനയിൽ നിന്ന് വരുന്നവർക്ക് വെള്ളത്തൂവൽ – ആനച്ചാൽ വഴിയും ഇവിടേക്ക് എത്താം.
