തിരുവനന്തപുരം: സഹകരണ ബാങ്കുകളിൽ സി.പി.എമ്മിന്‍റെ നേതൃത്വത്തിൽ നടക്കുന്ന സാമ്പത്തിക കൊള്ളയ്ക്കെതിരെ ബി.ജെ.പി ബഹുജന മാർച്ച് സംഘടിപ്പിക്കുന്നു. ഒക്‌ടോബർ രണ്ടിന് തിരുവനന്തപുരത്ത് സംഘടിപ്പിക്കുന്ന ബഹുജനന മാർച്ച് നടൻ സുരേഷ് ഗോപി ഉദ്ഘാടനം ചെയ്യും.
അതേസമയം, കരുവന്നൂർ ബാങ്ക് തട്ടിപ്പിനു പിന്നിൽ മുഖ്യമന്ത്രിയും സി.പി.എമ്മിലെ മറ്റു ഉന്നത നേതാക്കളുമാണെന്ന് ബി.ജെ.പി സംസ്ഥാന പ്രസിഡന്‍റ് കെ.സുരേന്ദ്രൻ ആരോപിച്ചു. അഴിമതിക്കാരെ സംരക്ഷിക്കാനും അന്വേഷണം മുതിർന്ന നേതാക്കളിലേക്ക് എത്താതിരിക്കാനുമുള്ള ശ്രമങ്ങളാണ് ഇപ്പോൾ നടക്കുന്നത്.
ആദ്യം പണം തട്ടിയെടുത്ത സി.പി.എമ്മുകാരെ കണ്ടെത്തി അവരിൽ നിന്ന് പണം തിരികെ കൊടുക്കുകയാണ് വേണ്ടത്. കോൺഗ്രസിന്‍റെ നേതൃത്വത്തിലും സമാനമായ തട്ടിപ്പുകൾ സഹകരണ ബാങ്കുകളിൽ അരങ്ങേറിയിട്ടുണ്ട്. ഏറ്റവും കൂടുതൽ തട്ടിപ്പു നടത്തിയ ആളാണ് മന്ത്രി വി.എൻ.വാസവനെന്നും അദ്ദേഹം പറഞ്ഞു.
