ന്യൂഡൽഹി: ഭാരത് അരിയുടെ പ്രഖ്യാപനം ഉടൻ നടത്താൻ കേന്ദ്ര സർക്കാർ. എഫ്.സി.ഐ വഴി ശേഖരിക്കുന്ന അരി കുറഞ്ഞ വിലയ്ക്ക് ജനങ്ങളിലേക്കെത്തിക്കുകയാണ് നീക്കം.
ഓപ്പൺ മാർക്കറ്റ് സെയിൽസ് പദ്ധതി വഴി നിലവിൽ നൽകുന്ന അതേ തുകയ്ക്ക് അരി നൽകണോ അതിലും കുറച്ച് ലഭ്യമാക്കണോ എന്നതിലും സർക്കാർ തീരുമാനമെടുത്തിട്ടില്ല.
ലോക്സഭ തെരഞ്ഞെടുപ്പിന് മുമ്പ്പ് കുറഞ്ഞ വിലയിൽ അരി വിപണിയിലിറക്കാനാണ് ആലോചന. ഇത് വഴി വിലക്കയറ്റം നേരിടുകയാണ് ലക്ഷ്യം. 25 രൂപയ്ക്കോ 29 രൂപയ്ക്കോ ആയിരിക്കും അരി വിപണിയിലെത്തിക്കുക.
ഫുഡ് കോർപറേഷൻ ഓഫ് ഇന്ത്യ വഴി സംഭരിക്കുന്ന അരിക്കാണ് ഭാരത് അരിയെന്ന ബ്രാൻറിങ് നൽകുക. നിലവിൽ ഭാരത് ആട്ട കിലോ 27.50 രൂപക്കും ഭാരത് പരിപ്പ് 60 രൂപക്കും കേന്ദ്ര സർക്കാർ വിതരണം ചെയ്യുന്നുണ്ട്.
ഇതേ മാതൃകയിലാകും ഭാരത് അരിയും ലഭ്യമാക്കുക. നാഫെഡ്, എൻസിസിഎഫ്, കേന്ദ്രീയ ഭണ്ഡാർ ഔട്ട്ലെറ്റുകൾ വഴി അരി വിതരണം നടത്തും. പ്രയോജനകരമാകുന്ന രീതിയിൽ അരിയും ആട്ടയും പരിപ്പുമെല്ലാം ലഭ്യമാക്കാൻ കഴിയുമോയെന്നത് വെല്ലുവിളിയാണ്.
ലോക്സഭ തെരഞ്ഞെടുപ്പിൽ വിലക്കയറ്റം, തൊഴിലില്ലായ്മ ഉൾപ്പെടെയുള്ള വിഷയങ്ങൾ മുഖ്യ പ്രചാരണ വിഷയമാക്കാൻ പ്രതിപക്ഷം നീങ്ങുമ്പോൾ അതിനെ മറികടക്കാനുള്ള വഴി കൂടെയാണ് ഭാരത് അരി പ്രഖ്യാപനത്തിലൂടെ കേന്ദ്രം ലക്ഷ്യം വയ്ക്കുന്നത്.
