കൊച്ചി: പെഗാസസ് ഗ്ലോബൽ പ്രൈവറ്റ് ലിമിറ്റഡ് സംഘടിപ്പിച്ച മണപ്പുറം യുണീക് ടൈംസ് ബിസിനസ് സമ്മിറ്റ് 2026 കൊച്ചി ലേ മെറിഡിയനിൽ വിജയകരമായി പൂർത്തിയായി. “ടൂറിസം വികസനം: ഹോസ്പിറ്റാലിറ്റി, ഹെൽത്ത്കെയർ, വെൽനസ് മേഖലകളിലൂടെ” എന്ന വിഷയത്തിലായിരുന്നു സമ്മിറ്റ് സംഘടിപ്പിച്ചത്. FICF, INMECC, അൽകാസർ, വൈബ് മൂന്നാർ, ഡി ക്യു ടി-ഷർട്ട്സ് എന്നിവരായിരുന്നു സമ്മിറ്റിന്റെ മുഖ്യ പങ്കാളികൾ. മണപ്പുറം ഫിനാൻസ് ലിമിറ്റഡ് ചെയർമാനും മാനേജിംഗ് ഡയറക്ടറുമായ ശ്രീ വി. പി. നന്ദകുമാർ ചടങ്ങ് ഉദ്ഘാടനം ചെയ്തു. മുൻ ഐ.എ.എസ് ഉദ്യോഗസ്ഥനും ഐക്യരാഷ്ട്രസഭയിലെ മുൻ ഉദ്യോഗസ്ഥനുമായ എം. പി. ജോസഫ് ഐ.എ.എസ് മോഡറേറ്ററായ ചർച്ചയിൽ പ്രമുഖ വ്യവസായ, ആരോഗ്യ, ടൂറിസം രംഗത്തെ പ്രമുഖർ പങ്കെടുത്തു.
വി.പി നന്ദകുമാർ, ചെയർമാനും മാനേജിംഗ് ഡയറക്ടറുമായ മണപ്പുറം ഫിനാൻസ് ലിമിറ്റഡ്; ഡോ. എസ്. സജികുമാർ, ചീഫ് ഫിസിഷ്യനും മാനേജിംഗ് ഡയറക്ടറുമായ ധാത്രി ആയുർവേദ ഹോസ്പിറ്റൽ & പഞ്ചകർമ്മ സെന്റർ; ഡോ. ജോസ് ചാക്കോ പെരിയപ്പുരം, സ്ഥാപകനും ചെയർമാനുമായ ഹാർട്ട് കെയർ ഫൗണ്ടേഷൻ; ശ്രീ ജെയിംസ് മാത്യു, സി.ഇ.ഒയും മാനേജിംഗ് പാർട്ടണറുമായ യു.എച്ച്.വൈ ജെയിംസ്; പ്രൊഫ. (ഡോ.) സുരേഷ് എച്ച്. അദ്വാനി, ചെയർമാൻ, സ്മിത മെമ്മോറിയൽ ഹോസ്പിറ്റൽ ആൻഡ് റിസർച്ച് സെന്റർ; ശ്രീ മനു ജി, എയർപോർട്ട് ഡയറക്ടർ, കൊച്ചി അന്താരാഷ്ട്ര വിമാനത്താവളം (CIAL); ശ്രീ രാജേഷ് മാലിക്, പ്രൊമോട്ടർ, കാർനൗസ്റ്റി ആയുർവേദിക് & വെൽനസ് റിസോർട്ട് എന്നിവർ പാനലിസ്റ്റുകളായി സംസാരിച്ചു.
ടൂറിസം, ഹോസ്പിറ്റാലിറ്റി, ഹെൽത്ത്കെയർ, വെൽനസ് മേഖലകളുടെ പരസ്പര സംയോജനവും, മെഡിക്കൽ ടൂറിസം, ഹോളിസ്റ്റിക് വെൽനസ് രംഗത്ത് ആഗോള കേന്ദ്രമായി വളരാനുള്ള കേരളത്തിന്റെ സാധ്യതകളും ചർച്ചയിൽ വിലയിരുത്തപ്പെട്ടു. ഈ മേഖലകളുടെ സമഗ്രമായ വളർച്ചയ്ക്കും ആഗോളതലത്തിൽ കേരളത്തിന്റെ സ്ഥാനം കൂടുതൽ ശക്തിപ്പെടുത്തുന്നതിനും നൂതന ആശയങ്ങളും സുസ്ഥിര വികസന രീതികളും തന്ത്രപരമായ സഹകരണങ്ങളും അത്യന്താപേക്ഷിതമാണെന്ന് പ്രമുഖർ അഭിപ്രായപ്പെട്ടു.
പെഗാസസ് ഗ്ലോബൽ പ്രൈവറ്റ് ലിമിറ്റഡ് സ്ഥാപകനും ചെയർമാനുമായ ഡോ. അജിത് രവിയുടെ നേതൃത്വത്തിൽ നടന്ന ഉച്ചകോടി, വ്യവസായ പ്രമുഖർക്കും നയരൂപകർത്താക്കൾക്കും ആശയങ്ങൾ പങ്കുവെക്കാനും ഭാവിയിലെ സാധ്യതകൾ ചർച്ച ചെയ്യാനും മികച്ച വേദിയായി മാറി. ഹെൽത്ത്കെയർ മികവ്, ലോകോത്തര ഹോസ്പിറ്റാലിറ്റി, സുസ്ഥിര ടൂറിസം എന്നീ മേഖലകളെ ഏകോപിപ്പിച്ചുള്ള സമഗ്രമായ സമീപനത്തിലൂടെ കേരളത്തിന്റെ ടൂറിസം മേഖലയ്ക്ക് കൂടുതൽ വളർച്ചയും ആഗോള അംഗീകാരവും കൈവരിക്കാനാകുമെന്ന് സമ്മിറ്റ് ചൂണ്ടിക്കാട്ടി.
