ഇടുക്കി: ബൈക്ക് അപകടത്തിൽ പരിക്കേറ്റ് ഇടുക്കി മെഡിക്കൽ കോളേജിലെത്തിയ യുവാവിന് ആവശ്യമായ ചികിത്സ നൽകിയില്ലെന്നും ആശുപത്രി അധികൃതരുടെ ഭാഗത്ത് നിന്ന് മോശം പെരുമാറ്റമുണ്ടായെന്നും പരാതി. പാറേമാവ് സ്വദേശിയ്ക്കാണ് ദുരനുഭവം നേരിടേണ്ടി വന്നത്. യുവാവിൻ്റെ മാതാവ് ജാസ്മിയാണ് ഈ വിവരം പങ്കുവെച്ചത്. പരിക്കേറ്റ ആളുമായി സ്കാനിങ്ങിനും മറ്റും പോകേണ്ടി വന്നപ്പോൾ സഹായത്തിന് ആരും എത്തിയല്ലെന്ന് ജാസ്മി പറയുന്നു. കൂടാതെ സി.റ്റി സ്കാനിങ്ങിനായി 2500 രൂപ ഉടനെ അടയ്ക്കണമെന്ന് ആവശ്യപ്പെടുകയും ചെയ്തു. അപകടത്തിൽ പരിക്കേറ്റ് ചെന്നതിനാൽ പണം കൈവശമില്ലെന്നും ഗൂഗിൾ പേ ചെയ്യാമെന്നും പറഞ്ഞിങ്കെലും അതിന് സമ്മതിച്ചില്ല. ഗൂഗിൾ പേ സൗകര്യം ഇല്ലെന്നും പൈസ കൈയിൽ തന്നെ വേണമെന്നും ജീവനക്കാർ നിർബന്ധം പിടിക്കുകയായിരുന്നുവെന്നും ജാസ്മി വ്യക്തമാക്കി. ഇത്തരം സന്ദർഭങ്ങളിൽ രോഗികൾക്ക് 48 മണിക്കൂർ ചികിത്സ നൽകാൻ മെഡിക്കൽ കോളേജ് സജ്ജമാക്കണമെന്ന് ജാസ്മിയും കുടുംബവും ആവശ്യപ്പെടുന്നു.
അപകടത്തിൽ പരിക്കേറ്റ് യുവാവിന് ആവശ്യമായ ചികിത്സ നൽകിയില്ല; ഇടുക്കി മെഡിക്കൽ കോളേജിനെതിരെ പരാതിയുമായി കുടുംബം
