കൊച്ചി: സ്കൂൾ വിദ്യാർഥികളുടെ ബാഗുകളുടെ ഭാരം കുറയ്ക്കാൻ നടപടികളുമായി സർക്കാർ. ഇതിൻറെ ഭാഗമായി ഒന്നാം ക്ലാസിലെ കുട്ടികളുടെ സ്കൂൾ ബാഗുകളുടെ ഭാരം 1.6 മുതൽ 2.2 കിലോഗ്രാമിന് ഇടയിലും പത്താം ക്ലാസിലെ കുട്ടികളുടെ ബാഗുകളുടെ ഭാരം 2.5 കിലോയ്ക്കും 4.5 കിലോയ്ക്കുമിടയിലും ആക്കുന്ന വിധത്തിൽ ക്രമീകരണങ്ങൾ നടത്താൻ പൊതു വിദ്യാഭ്യാസ വകുപ്പ് നിർദേശം നൽകും.
ഇതിന് പുറമെ മാസത്തിൽ നാലു ദിവസമെങ്കിലും ബാഗ് ഇല്ലാത്ത ദിനങ്ങൾ എന്നത് നടപ്പാക്കുന്ന കാര്യം പരിഗണനയിലാണെന്നും മന്ത്രി വി. ശിവൻകുട്ടി പറഞ്ഞു.
പാഠപുസ്തകങ്ങളുടെ ഭാരം കുറയ്ക്കുന്നതിനായി നിലവിൽ എല്ലാ പാഠപുസ്തകങ്ങളും രണ്ടു ഭാഗങ്ങളായിട്ടാണ് അച്ചടിച്ചു വിതരണം ചെയ്യുന്നത്. ഒരു ഭാഗത്തിന് 100നും 120നും ഇടയിലുള്ള പേജുകൾ മാത്രമാണ് ഇപ്പോഴുള്ളത്.
ഒന്നിലധികം നിലകളുള്ള സ്കൂളുകളിലടക്കം ഭാരമുള്ള ബാഗുമായി നടക്കേണ്ടി വരുന്നതിലുള്ള ബുദ്ധിമുട്ടുകൾ സംബന്ധിച്ച് വിദ്യാഭ്യാസ മന്ത്രിക്ക് നേരിട്ടും പരാതികൾ ലഭിച്ചിരുന്നു.